Nënkryetari i Gjykatës së Tiranës, Gerd Hoxha, i është drejtuar me një letër të hapur institucioneve të drejtësisë, përfshirë SPAK-un, Këshillin e Lartë Gjyqësor (KLGJ), Këshillin e Lartë të Prokurorisë (KLP), si dhe Komisionin e Verifikimit, ku kërkon përjashtimin e kandidatit Elton Kërluku nga gara për drejtimin e Byrosë Kombëtare të Hetimit (BKH).
Në shkresën e tij, gjyqtari Hoxha argumenton se Kërluku është përjashtuar nga Policia e Shtetit në vitin 2004 për shkelje të rënda disiplinore dhe etike, një vendim që, sipas tij, është mbajtur në fuqi edhe nga Gjykata e Lartë. Ai shpreh shqetësimin se një person me një të kaluar të tillë nuk mund të konsiderohet i përshtatshëm për të udhëhequr një strukturë kaq të rëndësishme dhe të ndjeshme si BKH.
“Elton Kërluku nuk plotëson kushtet e sigurisë për të qenë as pjesë e strukturës së SPAK, e jo më të garojë për drejtues të BKH-së” thuhet në letrën e Hoxhës.
Më tej, Hoxha thekson se, pas rikthimit në sistemin e drejtësisë, Kërluku ka shërbyer si hetues financiar pranë Prokurorisë së Posaçme (SPAK) dhe ka qenë pjesë e komisionit që në vitin 2024 përjashtoi vetë Hoxhën nga gara për një pozicion në Gjykatën e Posaçme. Sipas tij, kjo përbën një rast flagrant të dy standardeve.
“Nëse Komisioni më skualifikoi mua për një perceptim publik, si mund të justifikohet heshtja për një individ që është përjashtuar me vendim gjykate për shkelje të rënda etike dhe ligjore?”, shkruan Hoxha.
Në përfundim të letrës, Hoxha kërkon që ndaj Kërlukut të nisin hetime disiplinore dhe penale, duke theksuar se ai nuk plotëson kriteret e sigurisë për t’u emëruar në strukturat e BKH-së apo SPAK-ut, për shkak të dënimeve dhe masave të mëparshme disiplinore si efektiv i Policisë së Shtetit.
Pas testit fizik, të martën më datën 22 korrik, 7 kandidatët e pranuar në garën për drejtues të BKH-së do t’i nënshtrohen një tjetër testi, esesë me shkrim.
- Pjesë nga letra:
Hoxha shkruan se nga burime të hapura ai ka mësuar se shtetasi Elton Kërluku ka qenë punonjës i Policisë së Shtetit dhe me urdhërin e Drejtorit të Përgjithshëm të Policisë së Shtetit është përjashtuar nga policia me motivacionin: “shkelje e betimit, shkelje me dashje te normave të detyrës dhe abuzime të rënda me atributet e Policisë së Shtetit”, urdhër i cili është ankimuar fillimisht në gjykatë nga Kërluku, por i lënë në fuqi nga Apeli.
2. Nga burime të hapura – portalet weblajm.com dhe cna.al kam mësuar se, shtetasi Elton Kërluku ka qenë punonjës i Policisë së Shtetit dhe me urdhërin nr.934/4, dt.11.10.2004 Të Drejtorit të Përgjithshëm të Policisë së Shtetit është përjashtuar nga policia me motivacionin: shkejle e betimit, shkelje me dashje te normave të detyrës dhe abuzime të rënda me atributet e Policisë së Shtetit, sipas dispozitave të ligjit nr. 8553, datë 25.11.1999 “Për Policinë e Shtetit” dhe Rregullores së Disiplinës së Policisë miratuar me vendimin nr. 279, datë 02.06.2000 të Këshillit të Ministrave.
3. Ky vendim është ankimuar fillimisht nga shtetasi Elton Kërluku në Gjykatën e shkallës së parë Tiranë, duke anullar Urdhënrin e përjashtimit nga Policia e Shtetit.
Ky vendim është lënë në fuqi nga Gjykata e Apelit Tiranë, me vendimin e saj nr. 829, datë 06.09.2005.”– thuhet në letrën e Hoxhës.
Për këtë arsye gjyqtari Hoxha kërkon që të zbatohen “Përcaktimi i kushteve dhe kriteret shtesë që duhet të përmbushin shtetasit për t’u emëruar, transferuar apo për t’u ngritur në detyrë si gjyqtarë ose punonjës pranë gjykatave kundër korrupsionit dhe krimit të organizuar, prokurorë dhe punonjës pranë Prokurorisë së Posaçme, si dhe për t’u punësuar pranë Njësisë së Pavarur Hetimore.”
