Ademola Lookman është objektivi i ri i merkatos së Interit. Sipas mediave italiane, zikaltërit kanë piketuar nigerianin si emrin e ri për repartin e avancuar, të bindur se ai do të ndihmojë ekipin në fazën ofensive.
Interi kërkon përforcime në repartin e avancuar, për të shtuar alternativat në krah të Lautaro Martinez dhe Markus Turam, të vetmit që kanë një vend fiks. Taremi është drejt largimit dhe tashmë kërkohen futbollistë që t’i japin zgjidhje të reja lojës ofensive.
“Sky Sport” bën të ditur se nuk është vetëm një hipotezë e merkatos, por janë zhvilluar diskutime të mirëfillta mes palëve, aq sa zikaltrit kanë gjetur edhe gjuhën e përbashkët me futbollistin.
Por do të jetë pak e vështirë që të bindin Atalantën, e cila nuk do të heqë dorë lehtësisht nga lojtari i cili një vit më parë ishte edhe mes kandidatëve në votimin për “Topin e Artë”.
Bergamaskët vlerësojnë rreth 50 milionë euro sulmuesin dhe Interi duhet të plotësojë këtë kërkesë, i ndërgjegjshëm që Atalanta nuk ka “ngutin” të shesë futbollistë të tjerë, pasi shiti për 68,5 milionë euro Reteguin në Arabinë Saudite.
