Një aksident rrugor ka ndodhur pranë fshatit “Fushë Vërri”, në aksin Skërficë – Sarandë. Ngjarja është shkaktuar nga një shtetase spanjolle, Beatriz Aguilar, 48 vjeçe, e cila po drejtonte një automjet tip Dacia me targa AB662UB.
Sipas të dhënave paraprake, ajo ka humbur kontrollin mbi mjetin, duke goditur fillimisht një Volkswagen Golf me targa AA390UN, i drejtuar nga Flavio Sula, 20 vjeç. Pas përplasjes, automjeti i Aguilar është përplasur me një bordurë betoni dhe është përmbysur.
Fatmirësisht, aksidenti nuk ka sjellë pasoja në njerëz. Drejtuesja spanjolle u transportua në spitalin e Sarandës për kontroll mjekësor dhe ndodhet jashtë rrezikut për jetën. Ngjarja ka shkaktuar vetëm dëme materiale.
Grupi hetimor ndodhet në vendngjarje dhe po punon për të zbardhur rrethanat dhe shkaqet e aksidentit.
