Qytetarët e Elbasanit po ngrenë alarmin për gjendjen e liqenit të Treganit, në zonën e Llixhave. Denoncimet e mbërritura në redaksinë e JOQ Albania flasin për ndotje të rëndë, keqmenaxhim të ujërave dhe rrezik të shterimit të plotë të liqenit.
Së fundmi, një qytetar ka dërguar një mesazh ku shprehet se uji i liqenit është tepër i ndotur, me shkumë të bardhë dhe jeshile, mbeturina plastike në sipërfaqe dhe peshq të ngordhur.
“Është një situatë që përsëritet vazhdimisht. Uji është shumë i ndotur dhe nuk merret asnjë masë për pastrimin ose ruajtjen e këtij burimi natyror,” – shkruan ai, teksa ka dërguar edhe pamje ku pasqyrohet ndotja dhe peshqit e ngordhur.
Ndërkohë, vetëm disa ditë më parë, një qytetare tjetër ngriti shqetësimin për keqmenaxhimin e digës që kontrollon liqenin. Sipas saj, diga që më parë hapej në orare të caktuara për vaditje, tani lihet e hapur 24 orë në ditë që nga fillimi i qershorit, duke bërë që niveli i ujit të ulet me ritme të frikshme.
“Vetëm për një javë, niveli i ujit ka rënë mbi një metër. Nëse vazhdohet kështu, liqeni do të shterojë si vitin e kaluar,” – paralajmëroi ajo.
Fermerët e zonës janë gjithashtu të shqetësuar, pasi mungesa e ujit në muajt e thatë do të dëmtojë rëndë bujqësinë.
Banorët u bëjnë thirrje institucioneve lokale, në veçanti Bashkisë së Elbasanit, që të ndërhyjë menjëherë për të pastruar liqenin, për të kontrolluar ndotjen dhe për të menaxhuar me përgjegjësi rezervat ujore, sepse kjo pasuri natyrore është e përbashkët për të gjithë komunitetin./ JOQ
