Një ngjarje e rëndë ka ndodhur pasditen e djeshme në Valias, ku një 34-vjeçar, Franci Xhaferri, është plagosur me armë zjarri.
Autori i dyshuar, Besnik Koçiu ka qëlluar nga pakujdesia me armë zjarri dhe ka plagosur në këmbë Franci Xhaferrin me të cilin jetonte në të njëjtën lagje. I plagosuri ndodhet në spital, jashtë rrezikut për jetën.
Pas hetimeve të shpejta, policia ka arrestuar Besnik Koçiun dhe ka sekuestruar armën e përdorur në banesën e tij.
Në pranga ka përfunduar edhe i plagosuri, pasi nuk ka bashkëpunuar me hetuesit dhe ka penguar zbardhjen e ngjarjes, duke mos dhënë informacion të saktë për rrethanat dhe autorin.
“Specialistët për Hetimin e Krimeve të Komisariatit të Policisë Nr. 5, pas marrjes së njoftimit se pasditën e djeshme ishte paraqitur në spital për ndihmë mjekësore një shtetas, dyshohet i plagosur me armë zjarri, menjëherë organizuan punën për dokumentimin e plotë ligjor të ngjarjes dhe identifikimin e autorëve të dyshuar.
Nga veprimet e shpejta hetimore u bë identifikimi, kapja dhe vënia në pranga e shtetasit B. K., 51 vjeç, i cili dyshohet se nga pakujdesia, pasditen e djeshme, në një lokal në Valias, ka qëlluar me armë zjarri në këmbë shtetasin F. Xh., 34 vjeç, me të cilin banonin në të njëjtën lagje. Ky i fundit ndodhet në spital, jashtë rrezikut për jetën.
Gjithashtu, u arrestua edhe shtetasi F. Xh. (i dëmtuari), pasi gjatë procesit hetimor nuk bashkëpunoi plotësisht, duke mos dhënë informacion të mjaftueshëm mbi rrethanat dhe personin e dyshuar si autor të plagosjes.
Më tej, gjatë kontrollit të banesës së 51-vjeçarit, u gjet dhe u sekuestrua arma e zjarrit, pistoletë, me të cilën dyshohet se është kryer plagosja.”– njofton policia.
Materialet procedurale iu referuan Prokurorisë së Tiranës, për veprime të mëtejshme.
