David Domgjoni i dha lamtumirën pak javë më parë Partizanit, duke mbyllur bashkëpunimin me klubin kryeqytetas. Dhe mbrojtësi nuk ka vonuar të gjejë një skuadër të re për të vazhduar karrierën e tij, përsëri jashtë Superiores.
Futbollisti është prezantuar sot zyrtarisht te klubi i Hapoel Jerusalem në elitën e futbollit izraelit. Domgjoni ka firmosur një kontratë dyvjeçare me opsion për një tjetër sezon me klubin izraelit i cili kishte katër vite që e kërkonte.
Në fakt, mbrojtësi duhej të kishte firmosur katër vite më parë me këtë klub dhe ishte shumë pranë marrëveshjes, por një ofertë e Lucernës në kampionatin zviceran ishte më tunduese për karrierën e tij, ndaj ai ndryshoi destinacion.
Me largimin nga Partizani, për Domgjonin u rikthye mundësia e firmës me Hapoel Jerusalem dhe palët kanë gjetur më në fund akordin. “Unë dëgjova për herë të parë rreth Hapoelit 4 vite më parë dhe e kam ndjekur që atëherë.
Jam i lumtur që më në fund erdhi koha që t’i bashkohem këtij klubi special me tifozët e tij të jashtëzakonshëm. Unë jam shumë i lumtur që jam këtu. Do të bëj maksimumin që të arrij objektivat e skuadrës”, ishin fjalët e Domgjonit pas firmës me klubin izraelit.
Në fakt, Hapoel Jerusalem është me të vërtetë një klub i veçantë, pasi zotërohet plotësisht nga tifozët e kësaj skuadre. Ai u krijua në vitin 2007 nga tifozët e Hapeol Jerusalem me një emër tjetër në formë proteste ndaj klubit të vërtetë me këtë emër i cili u shpërbë në vitin 2019.
Në vitin 2020 ata blenë të drejtën e emrit për klubin që kishin krijuar dhe që e administrojnë me shumë sukses prej vitesh duke e ngjitur deri në elitë.
