Milano është përfshirë nga një mot i keq me reshje të dendura shiu dhe stuhi të forta, ndërsa disa vende përballen me temperatura të larta dhe zjarre.
Sipas La Repubblica, autoritetet raportojnë për një viktimë dhe dy të plagosur, pasi një pemë ka rënë pas stuhive të forta.
Viktima ishte një grua 63-vjeçare e cila u godit për vdekje nga rënia e një peme të madhe, në zonën Robecchetto con Induno, në perëndim të Milanos.
Ajo po kthehej nga një shëtitje në shoqërinë e dy personave të tjerë një burri dhe një gruaje, të cilët mbetën të plagosur dhe u dërguan me urgjencë në spital.
Zjarrfikësit lokalë njoftuan se kanë ndërhyrë në rreth 50 raste të emergjencave të shkaktuara nga moti i keq. Dëmet kryesore janë shkaktuar nga pemët e rrëzuara, përmbytjet në bodrume dhe lokale, si dhe rrëzimi i tabelave reklamuese nga erërat e fuqishme.
Sipas mediave italiane, reshjet e dendura kanë përfshirë edhe rajonin e Venetos, përreth qyteteve Belluno dhe Vicenza, ndërsa situatë e ngjashme është raportuar edhe në pjesë të Toskanës.
Ndërkohë, ndërsa veriu përballet me stuhi dhe erëra të forta, në pjesët jugore dhe qendrore të Italisë, përfshirë Romën, temperaturat mbeten mbi 30°C.
Evropa po përjeton një valë të nxehti të pazakontë për këtë periudhë, të cilën autoritetet e lidhin me të paktën tetë humbje jete në disa vende të kontinentit.
