Tragjedia në Teksas/ 59 viktima nga përmbytjet, ende të zhdukur 27 fëmijë 

Numri i viktimave nga përmbytjet shkatërrimtare që goditën Teksasin jugor është rritur në 59, ndërsa kërkimet për të zhdukurit vazhdojnë. Sipas autoriteteve amerikane, mes të zhdukurve janë edhe 27 fëmijë që po merrnin pjesë në një kamp veror përgjatë lumit Guadalupe.

Përmbytjet u shkaktuan nga reshje të dendura që përfshinë Teksasin qendror të premten, në Ditën e Pavarësisë së SHBA-së. Brenda vetëm një ore, niveli i lumit Guadalupe u rrit me plot tetë metra, duke marrë përpara shtëpi dhe duke izoluar banorë të tërë. Shumë qytetarë kanë denoncuar faktin se alarmi për evakuim mbërriti vetëm pasi përmbytja kishte filluar.

Në Qarkun Kerr, më i godituri deri më tani, janë regjistruar 43 viktima – 28 të rritur dhe 15 fëmijë. Po aty ndodhej edhe “Camp Mystic”, një kamp i krishterë për vajza, ku ndodhen fëmijët e zhdukur. Drejtori i këtij kampi dhe i një tjetri në afërsi janë mes viktimave, sipas njoftimit zyrtar të qytetit të Kerrville.

Shtatë viktima të tjera janë konfirmuar në qarqet Travis, Burnett dhe Tom Green. Drejtori i Menaxhimit të Emergjencave në Teksas, Nim Kidd, tha se ekipet e kërkim-shpëtimit po operojnë nga ajri, toka dhe uji, në përpjekje për të gjetur të mbijetuar ose viktima të tjera në lumin Guadalupe.

Për shkak të situatës alarmante, guvernatori i Teksasit, Greg Abbott, shpalli gjendjen e fatkeqësisë natyrore dhe kërkoi ndihmë shtesë nga qeveria federale. Ndërkohë, Sekretarja për Sigurinë Kombëtare, Kristi Noem, u shpreh se Presidenti Donald Trump synon të “modernizojë teknologjitë për parashikimin e motit dhe menaxhimin e emergjencave”, pasi administrata e tij është kritikuar për shkurtime fondesh dhe mungesë burimesh për përballimin e katastrofave natyrore.

Banorët e prekur kanë ngritur shqetësime serioze për mungesën e paralajmërimit, ndërsa Noem premtoi se do t’i përcjellë këto shqetësime qeverisë federale. Në zonat e përmbytura, pamjet tregojnë rrënoja, pemë të shkulura dhe qytetarë që vrapojnë në panik, ndërsa përmbytjet vijojnë të shkaktojnë dëme të mëdha materiale e njerëzore.

#BREAKING: A life threatening flash flood emergency has been declared with multiple fatalities reported
⁰#Kerrville | #Texas

At this time, the National Weather Service in Texas has issued a flash flood emergency as life-threatening, catastrophic flooding is occurring in… pic.twitter.com/VS9H2o2HUh

— R A W S A L E R T S (@rawsalerts) July 4, 2025