Futbollistët portugezë, Diogo Jota i Liverpool dhe i vëllai, Andre Jota i Penafiel ndërruan jetë mëngjesin e të enjtes në një aksident në Spanjë.
Të dy në moshë të re i ishin përkushtuar futbollit, teksa Diogo mbylli një sezon të shkëlqyer me Liverpoolin dhe Portugalinë, duke fituar Premier League dhe Ligen e Kombeve me Portugalinë.
Diogo Jota iu bashkua Liverpool në vitin 2020 nga Wolves për 44.7 milionë euro. Që atëherë, ai bëri 182 paraqitje për të kuqtë, duke shënuar 65 gola dhe duke dhënë 26 asiste.
Gjatë kësaj kohe, ai fitoi tre tituj me Liverpoolin, një titull të Premier Ligë (2024-25), një titull të Kupës FA (2021-22) dhe një titull të League Cup (2021-22).
Në planin personal, futbollisti Diogo Jota sapo ishte martuar me të dashurën e tij të gjithë jetës, Rute Cardoso, më 22 qershor 2025.
Në fakt, postimi i tij i fundit në llogarinë personale në “X” ishte një mesazh me katër foto nga ceremonia e martesës me partneren, me tekstin: “Po, përgjithmonë”.
Diogo Jota dhe partnerja e tij kishin tre fëmijë së bashku. Jashtë fushës, Jota njihej për karakterin e tij të rezervuar dhe pasionin për lojërat elektronike, madje kishte marrë pjesë në turne eSports.
Lajmi për vdekjen e tij ka shkaktuar një valë tronditjeje në botën e sportit. Klube, shokë skuadre dhe tifozë kanë shprehur dhimbjen dhe kanë nderuar një futbollist që jo vetëm spikati për performancën në fushë, por edhe për përulësinë dhe profesionalizmin.
Diogo Jota lë pas një trashëgimi të paharrueshme në futbollin portugez dhe atë ndërkombëtar.
