Ambasada e Gjermanisë në Kosovë i kërkoi Serbisë të bëjë më shumë për uljen e tensioneve me Kosovën, në vend që vetëm të bëjë thirrje për ndaljen e veprimeve përshkallëzuese të Prishtinës. Thirrjet vlejnë për të dyja palët njëlloj, thuhet në një reagim të ambasadës gjermane. Një ditë më parë ajo i kërkoi Prishtinës që të ndalë veprimet që mund të përshkallëzojnë situatën, pasi qeveria e Kosovës vuri gurthemelin për ndërtimin e dy urave të reja mbi lumin Ibër.
Petkoviq: Urat mbi Ibër përdoren për “fushatë zgjedhore”
Shefi i zyrës për Kosovën në qeverinë e Serbisë, Petar Petkoviq i shkroi një letër vendeve të Bashkimit Evropian, nga të cilat kërkoi që “t’i ndalin veprimet përshkallëzuese të Prishtinës”, lidhur me ndërtimin e planifikuar të dy urave të reja mbi lumin Ibër në Mitrovicë, gurthemeli, i të cilave u përurua një ditë më parë nga qeveria e Kosovës. Petkoviq e akuzoi kryeministrin e Kosovës në detyrë, Albin Kurti, se po i përdor urat mbi Ibër për “fushatë zgjedhore”, pasi zgjedhjet lokale në Kosovë mbahen këtë vjeshtë. “Duke njoftuar se urat do të hapen në tetor, para zgjedhjeve lokale, Kurti me vetëdije po e vë çështjen e sigurisë në shërbim të fushatës zgjedhore. BE-ja duhet ta ndalojë Kurtin në planet e tij para se të jetë tepër vonë”, tha në letër Petkoviq.
Thirrjet për mosshkallëzim vlejnë edhe për Serbinë
Pas letrës së Petkoviq ka reaguar edhe ambasada gjermane në Kosovë, e cila iu përgjigj shefit të zyrës për Kosovën në qeverinë e Serbisë, ku thuhet se e ka parasysh letrën e Petkoviqit, por ka theksuar, se thirrjet e vazhdueshme që i Qeverisë së Kosovës për përmbajtje nga veprime që mund ta përshkallëzojnë gjendjen, vlejnë edhe për Serbinë. “Nuk është Qeveria e Kosovës ajo që po dështon të zbatojë masa ligjore ndaj përgjegjësve për sulmin e tmerrshëm në Banjskë. Fakti që udhëheqësi i vetëdeklaruar i atij sulmi, serbi i Kosovës dhe ish-nënkryetari i Listës Serbe, Radoiçiq, e pranoi publikisht përgjegjësinë dhe megjithatë vazhdon të lëvizë lirshëm në territorin serb, minon thellë përpjekjet për ndërtimin e besimit dhe llogaridhënies në rajon”, thuhet nga ambasada gjermane, duke iu referuar sulmit të shtatorit të vitit 2023, kur një grup serbësh sulmoi policinë e Kosovës dhe vrau një rreshter policor. Prokuroria Speciale e Kosovës tashmë ka lëshuar fletarrestin për Milan Radoiçiqin dhe vazhdimisht i kërkon Serbisë që ta ekstradojë atë në Kosovë. Ambasada gjermane tha se “mosndjekja penale e autorëve të dhunës është po aq e dënueshme dhe kundërproduktive sa çdo veprim i pakoordinuar nga Prishtina”.
Kurti: Urat përkushtim që mes veriut dhe jugut të ketë më shumë bashkëpunim
Qeveria e Kosovës do të ndërtojë dy ura të reja në të dy anët e urës kryesore mbi lumin Ibër në Mitrovicë. Kryeministri në detyrë i Qeverisë së Kosovës, Albin Kurti, tha se qeveria e tij synon ta lidhë Mitrovicën e veriut dhe atë të jugut. Pjesa veriore e Mitrovicës banohet me shumicë serbe, ndërsa ajo jugore me shumicë shqiptare. Sipas Kurtit, ndërtimi i dy urave të reja, njëra për automjete dhe tjetra për këmbësorë, që pritet të përfundojnë në vjeshtë, tregon përkushtimin e qeverisë së tij, “që ndërmjet veriut dhe jugut të ketë sa më shumë komunikim, qarkullim, bashkëpunim e shkëmbime”.
Presidenti i Serbisë Aleksandar Vuçiq ka protestuar te BE-ja, pasi Qeveria në detyrë e Kosovës vendosi gurthemelet për ndërtimin e dy urave të reja mbi lumin Ibër, sipas televizionit publik serb RTS. “Kanë bërë shumë gjëra dhe tani kemi parë që kanë vendosur gurthemele për dy ura, pa marrë pëlqimin e popullit serb dhe të njerëzve nga Mitrovica e Veriut. Kjo nënkupton eksod përfundimtar”, tha Vuçiq në RTS./DW
