Ka përfunduar procesi i rinumërimit për të gjitha kutitë e Qarkut të Fierit, si për votat e subjekteve politike ashtu edhe për ato preferenciale. Ndryshimi i vetëm është humbja e mandatit të Zegjine Çaushit, ku pas rinumërimi i kalon kandidates tjetër socialiste Maldrita Bardho.
Pas rinumërimit të 586 kutive në total, rezulton se Partisë Demokratike i janë hequr 147 vota nga rezultati i 11 Majit, ndërsa Partisë Socialiste i janë shtuar 30 vota. Gjithsesi, rezultati në mandate mbetet i pandryshuar, 12 me 4 në favor të socialistëve, ku demokratët nuk arrijnë dot të fusin në Kuvend as deputetët e listës së mbyluur.
Rinumërimi në Fier u kërkua nga koalicioni “Nisma Shqipëria Bëhet” dhe u mbështet nga Partia Demokratike, kërkesë e cila u pranua nga Komisioni i Ankesave dhe Sanksioneve. “Nisma Shqipëria Bëhet” pretendonte për një mandat në Fier, por nga rinumërimi i janë hequr 8 vota.
VOTAT PREFERENCIALE
E teksa tek votat për subjektet politike, ndryshimi i rezultatit ishte i vogël, ku ato pak vota mund të ketë qenë gabime njerëzore, “masakra”, duket se ishte bërë tek votat preferenciale, me vjedhje votash brenda llojit.
Rekordin e mban Ceno Klosi, një prej zyrtarëve më besnik të Belinda Ballukut, i cili gjatë viteve 2021 – 2024 ka mbajtur detyrën e Drejtorit të Përgjithshëm të Tatimeve, teksa aktualisht është zëvendësministër i Infrastrukturës dhe Energjetikës.
Më parë, ai ka mbajtur prej 7 vitesh pozicionin e Drejtuesit Financiar në operatorin kryesor të sektorit energjetik (OSHEE), si dhe për një periudhë disa mujore pozicionin e Drejtorit të Përgjithshëm të Agjencisë Kombëtare të Ujërave dhe Mbetjeve (AKUM).
Në zgjedhjet parlamentare të 11 Majit, Ceno Klosi rezultuoi më të votuarit në Qarkun e Fierit me 19 290 vota në total. Pas tij vinte një tjetër besnik i Ballukut, drejtori i Agjencisë së Ujësjellës Kanalizimeve, Klevis Jahaj, me 15 680 vota preferenciale.
Nga rinumërimi, Ceno Klosit 831 vota, të cilat duket se i ishin shtuar fiktivisht nga komisionerët më 11 Maj. Ai duket se u ka vjedhur vota të gjithë kandidatëve, por dëmin më të madh duket se ia ka bërë pikërisht Klevis Jahajt, të cilit pas rinumërimit i janë shtuar 497 vota.
Ky “trafikim” kaq i madh votash brenda llojit, nuk mundej kurrsesi të bëhej pa “bekimin” e drejtueses së Qarkut Belinda Ballukut, e cila u jepte urdhra komisionerëve dhe numëruesve socialistë. Mbetet për t’u parë tashmë se si do të jetë reagimi i Klevis Jahajt, pas rezultatit të rinumërimit, ku vlen të theksohet faktin se ai njihet edhe për temperamentin e tij sanguin dhe kolerik.
NDRYSHIMI KRYESOR
Ndryshimi kryesor nga rinumërimi është humbja e mandatit të Zegjine Çaushit. Një zyrtare në Bashkinë e Roskovecit, Zegjineja ishte një emër pothuajse i panjohur për publikun, deri në momentin kur Gazment Bardhi denoncoi se ajo, përmes të ëmës Vjollca Caushi, kishte përfituar grante për ndërtimin e një bujtine.
Zegjine Çaushi iu përgjigj Bardhit me një video ironike, të cilat i kishte të shpeshta gjatë gjithë fushatës, sa herë që Bardhi sulmon Ballukun. Kjo e fundit e përdori Zegjine Çaushin për të ironizuar kundërshtarin e saj kryesor në Fier, teksa në këtë mënyrë Zegjineja përfitonte promovim nga mediat pranë Qeverisë.
Në zgjedhjet e 11 Majit, Zegjine Çaushi arriti të merrte mandatin e 12-të të socialistëve në Fier me 4 674 vota preferenciale në total, teksa pas saj, ajo që e humbi mandatin ishte Maldrita Bardho me 4 610 vota. Pra, diferenca mes tyre ishte vetëm 64 vota.
Pas rinumërimit, Zegjine Çaushit i janë hequr 48 vota, ndërsa kandidates Maldrita Bardhos i janë shtuar 26 vota. Kjo ka sjellë që kjo e fundit të shkojë 10 vota më shumë se sa Zegjine Çaushit duke i marrë kështu edhe mandatin e deputetit.
Zegjine Çaushi videot ironizuese i ka vazhduar edhe pas 11 Majit, ku mezi e priste përballjen në Kuvend me Gazment Bardhin, teksa i shkoi dëm kot edhe Akademia Politike, ku Edi Rama e mësoi se si duhej të sillej në Kuvend.
Zegjine Çaushit, duket se tashmë e vetmja shpresë për t’u futur në Kuvend i ka mbetur tek SPAK-u, nëse ky i fundit vendos të çojë ndonjë nga “Çunat e Belës” në burg.
Ceno Klosi është nën hetim për korrupsion që prej Marsit të vitit të kaluar, ku ka dëshmuar edhe vetë për hetimet ndaj tij në Tetor, teksa sipas drejt të njëjtës rrugë duket se është edhe Klevis Jahaj.
NJË E PREFERUAR EDHE NË PD
Të “preferuar” nga numrimi i votave më 11 Maj duket se kanë pasur edhe komisionerët demokratë. Kjo për faktin se kandidates demokrate pas rinumërimit i janë hequr 671 vota preferenciale dhe me një shifër të tillë, zor se dikush do e besonte se kemi të bëjmë me gabime njerëzore.
Po ashtu, pas rinumërimit i janë hequr edhe Gentian Çelës 212 vota, Ajet Gurgurit 141 vota dhe Gentian Koçit 131 vota.
Ndërkohë, kandidatëve që u janë shtuar më shumë janë Ledion Çala 135 vota dhe Suzana Numanit (Rama) 122 vota.
Gjithsesi, ato nuk mund të sjellin ndonjë ndryshim pasi demokratët në Fier nuk arritën të çonin as 5 kandidatët e listës së mbyllur në Kuvend.
Çunat e Belës nuk heqin dorë nga vesi, Ceno Klosi i vjedh votat Klevisit të Ujësjellësit
