FIFA është vënë në qendër të kritikave pas thirrjeve për ndryshimin e orareve të fillimit të ndeshjeve në Kampionatin Botëror 2026, për shkak të rrezikut të lartë nga temperaturat ekstreme që pritet të prekin disa qytete pritëse në Amerikën e Veriut.
Sipas FifPro, sindikata globale e futbollistëve që përfaqëson mbi 70,000 lojtarë profesionistë, ndeshjet që do të zhvillohen në mesditë dhe pasdite në qytete si Miami, Monterrey dhe Kansas City duhen shtyrë në orare të vona, për të mbrojtur shëndetin e sportistëve.
Qytete të tjera si Bostoni, Filadelfia dhe Guadalajara janë klasifikuar si zona me “rrezik shumë të lartë”, ndërsa Los Anxhelosi dhe Nju Jorku/Nju Xhersi konsiderohen si zona me “rrezik të lartë” për shkak të kushteve të motit.
Drejtori i politikave të FifPro, Alexander Bielefeld, tha se situata e krijuar gjatë Kupës së Botës për Klube duhet të shërbejë si “një thirrje zgjimi” për FIFA-n. Ai theksoi se përvojat nga ky turne kanë nxjerrë në pah rreziqet që paraqet loja në temperatura ekstreme, duke theksuar nevojën për planifikim më të sigurt të orareve të ndeshjeve.
Ndërkohë, drejtori mjekësor i FifPro, Dr. Vincent Gouttebarge, paralajmëroi për rreziqe serioze shëndetësore si pasojë e lojës në vapë ekstreme: “Nga hulumtimet tona, disa qytete ku do të zhvillohet Botërori mund të konsiderohen zona me rrezik të lartë për sëmundje të lidhura me nxehtësinë – dhe në disa raste, edhe me rrezik jashtëzakonisht të lartë.”
Ai theksoi veçanërisht qytete si Orlando dhe Miami, ku për shkak të klimës subtropikale, ndeshjet në mesditë mund të përbëjnë një kërcënim real për sigurinë fizike të lojtarëve.
Eksperti britanik i fiziologjisë së temperaturave ekstreme, Profesor Mike Tipton nga Universiteti i Portsmouth, ka propozuar që finalja e Botërorit 2026 të luhet në orën 9 të mëngjesit, si një masë për të shmangur rrezikun nga nxehtësia ekstreme.
Në pritje të një reagimi zyrtar nga FIFA, presioni për të rishikuar oraret e ndeshjeve në qytetet me klimë të nxehtë po rritet gjithnjë e më shumë, teksa komuniteti futbollistik ndërkombëtar bën thirrje për masa proaktive që vënë shëndetin e lojtarëve përpara interesave komerciale.
