Avokati Sali Berishës, Genc Gjokutaj, foli sot në emisionin “Log.” për shtyrjen e seancës për dosjen Partizani, ku i pandehur është marrë edhe lideri demokrat.
Gjokutaj tha se seanca u shty sot për shkak të mos njoftimit të Berishës, duke shtuar se gjykimet nuk kanë limit kohor dhe mund të shtyhen.
Avokati u ndal te kërkesa e gjyqtares Elsa Ulliri për dorëheqje nga çështja penale ndaj të pandehurve Sali Berisha, Jamarbër Malltezi dhe të tjerë në dosjen Partizani. Ai tha se vendimi nëse do pranohet ose jo dorëheqja e gjyqtares Elsa Ulliri, i përket kryetarit të gjykatës.
Gjithashtu ai tha se nuk mendon se gjyqtarja për deri sa mban ende postin, do të ndikohet nga kushërira e saj, deputetja demokratë, Andia Ulliri.
Genc Gjokutaj: Gjykimet janë si ndeshjet e volejbollit, mund të përfundojnë 3 me 0 ose 3 me 2 dhe mund të zgjasin në kohë. Sot u shty për arsye se një nga shkaqet ishte mos njoftimi i Berishës. Shqetësimi nuk është ky në fakt. Ajo që gjykata nuk i ikën dot është fakti që nuk po shprehet me vendim, çfarë do bëjë me gjyqtaren e rastit. Gjyqtarja ka dhënë dorëheqjen 3 javë më parë. Nëse gjykata vendos që gjykatësja të qëndrojë, ajo do të vazhdojë gjyqin.
Këtë vendim nëse do pranohet ose jo dorëheqja e gjyqtares Elsa Ulliri, e vendos kryetari i gjykatës në përjashtim nga rasti kur e kërkojmë ne përjashtimin e një gjyqtari, ose prokurori. Ky problem është i tillë që këtë e shqyrton kryetari i gjykatës. Gjykata nuk po shprehet se çfarë do bëjë me atë gjyqtare. Nuk mendoj se ajo do ndikohet nga Andia dhe Andia do të bëhet theror për zotin Berisha që ti thotë ti s’ke për të dënuar liderin tim. Në drejtësi duhet të merret një vendim, palët nuk vijnë në një konsensus.
Kallëzimi që është bërë është i rremë. Fabula e kallëzimit që u bë në fillim nuk ka të bëjë me fabulën e kërkesës për gjykim. Nuk ekziston fakti penal, nuk ka asnjë konflikt as penal, as pronësor ndaj këtyre subjekteve dhe kjo ka qenë pjesë e programit të PD, ligji për pronat që është bërë atëherë dhe nuk është bërë për përfitim personal të dhëndrit të zotit Berisha, por ka shumë përfitues. Ligji parashikon shumë filtra proceduralë.
