Luftëtari gjeorgjian Ilia Topuria është kampioni i ri i botës në peshën e lehtë (pesha lightweight, 66-70kg). Në eventin UFC-317 zhvilluar në Las Vegas ai mundi me KO në raundin e parë brazilianin Charles Oliveira.
Ndonëse pritej një përballje më e fortë, gjithcka u zgjidh shumë shpejt në favor të Topuria, tashmë kampion i dyfishtë i botës (ka mbajtur edhe titullin e peshës featherweight, pesha 62-66kg, që e nxori vakant).
Oliveira, ish-kampion në peshën e lehtë, ishte shumë larg asaj që pritej. Ai pësoi humbjen e 11-të në karrierë, ku numëron edhe 35 fitore e 1 duel pa rezultat. Ndërsa për gjeorgjianin kjo është fitorja e 17-të (nuk ka asnjë humbje).
Që në sekondat e para të kësaj sfide që zgjati rreth 3 minuta, Topuria e vuri në vështirësi Oliveira. Më pas, një e majtë e tij e hodhi në tapet brazilianin, duke mos u ngritur më, ndërsa gjeorgjiani nis festën në kafaz.
