Europa po përballet me një valë të hershme dhe ekstreme të nxehtësisë, e cila ka përfshirë një sërë vendesh duke ngritur alarme shëndetësore dhe paralajmërime për zjarre në disa zona.
Në Itali, rreth 20 qytete të mëdha janë vënë në gjendje gatishmërie, ndërsa Ministria e Shëndetësisë ka shpallur alarm të kuq për Romën dhe Venedikun për shkak të temperaturave që përbëjnë rrezik edhe për njerëzit në gjendje të mirë shëndetësore. Kujtojmë se në vitin 2021, Italia theu rekordin e temperaturës në Europën kontinentale me 48.8°C, sipas Organizatës Botërore Meteorologjike.
Në Francë, 14 departamente janë në alarm portokalli, me temperatura deri në 40°C të parashikuara nesër. Rajonet Bouches-du-Rhône, Gard, Hérault dhe Pyrénées-Orientales, në jug të vendit, po përballen me rreziqe serioze zjarri, ndërsa pishinat publike në Marsejë janë shpallur falas për qytetarët gjatë kësaj periudhe ekstreme. Autoritetet kanë mbyllur 14 zona pyjore në Provencë, për të parandaluar përhapjen e zjarreve.
Spanja jugore pritet të përjetojë kulmin e vapës të dielën dhe të hënën, me temperatura që shkojnë deri në 42°C, veçanërisht në jug, qendër dhe lindje të vendit. Agjencia meteorologjike AEMET njoftoi se në disa zona, temperaturat minimale nuk do të zbresin nën 25°C, çka e bën situatën edhe më të rëndë për shëndetin.
Edhe Portugalia është përfshirë nga vala përvëluese. Të dielën, dy të tretat e territorit do të jenë në alarm portokalli, ndërsa në Lisbonë priten deri në 42°C dhe rrezik maksimal zjarresh.
Vapa ka përfshirë edhe Ballkanin, ku temperaturat në Serbi ditët e fundit kanë arritur deri në 39°C, pothuajse 10 gradë më shumë se mesatarja për këtë periudhë, duke bërë që autoritetet të kërkojnë vigjilencë të lartë.
Ekspertët meteorologë paralajmërojnë se kjo është vetëm vala e parë e verës, ndërsa përmasat e saj pritet të rriten gjatë muajve në vijim. Autoritetet në të gjithë rajonin apelojnë për kujdes të shtuar, sidomos për të moshuarit, fëmijët dhe personat me probleme shëndetësore.
