Presidenti amerikan Donald Trump ka reaguar ndaj aludimeve se Irani mund të ketë larguar uranium të pasuruar nga centrali bërthamor në Fordo përpara sulmit amerikan.
Në një postim në rrjetet sociale, Trump theksoi se nuk ka patur asnjë lëvizje të tillë. “Asgjë nuk u nxor nga objekti,” deklaroi ai, duke shtuar se transportimi i materialit bërthamor do të ishte “shumë i rrezikshëm, shumë i rëndë dhe i vështirë për t’u lëvizur”.
Sipas Trump, makinat dhe kamionët e vegjël të parë në zonën përreth centralit nuk kishin lidhje me lëvizje uraniumi, por u përkisnin punëtorëve që po punonin për të mbuluar pjesën e sipërme të boshteve të ventilimit me beton.
Edhe sekretari amerikan i Mbrojtjes, Pete Hegseth, mohoi këto pretendime gjatë një konference për shtyp, duke i cilësuar spekulative dhe të pabazuara.
Më herët, Gjenerali Caine, kreu i Shefave të Përbashkët të Shtabit të SHBA-ve, deklaroi se sulmi ajror kishte shënjestruar pikërisht boshtet e ventilimit të centralit në Fordo, të cilat konsiderohen si një nga pikat më të ndjeshme të strukturës nëntokësore iraniane.
