Prokuroria e Posaçme (SPAK) ka përfunduar fazën e verifikimit paraprak të kandidatëve që kanë aplikuar në garën për të marrë drejtimin e Byrosë Kombëtare të Hetimit (BKH), pas përfundimit të mandatit të drejtueses aktuale Aida Hajnaj.
SPAK, përmes një komunikate për mediat, ka bërë me dije se nga 13 kandidatë që kishin aplikuar në total, 6 prej tyre janë skualifikuar, ndërsa 7 të tjerë do të vazhdojnë garën duke kaluar nga fazat e tjera.
Nga gara është skualifikuar drejtori i Përgjithshëm i Agjencisë Kombëtare të Mbrojtjes Civile, Haki Çako, si dhe ish-prokurori Astrit Halilaj, oficerët e OPGj-ve Marinela Pilinçi dhe Nevruz Ndregjoni, inspektori i AMP-së Maoricio Sheldija dhe Miklovan Kanani.
Ndërkohë, 7 kandidatët që do të vijojnë garën për të qenë në krye të BKH-së janë: ish-drejtori të Përgjitshëm të Policisë së Shtetit, Gledis Nano, zëvendësdrejtor i BKH-së, Joni Keta, ish-shefi i Policisë, Elton Kërluku, prokurori i Tiranës Andi Pogaçe.
Po ashtu, janë kualifikuar edhe Gentian Ndoi, i cili prej disa vitesh mban postin e drejtor për Hetimin e Krimit Ekonomik dhe Financiar në Drejtorinë e Përgjithshme të Policisë së Shtetit, Gentjan Shehaj, ish-drejtues i Policisë së Vlorës dhe Lezhës, teksa aktualisht është drejtor i kurrikulave në Akademinë e Sigurisë, si dhe Artur Beu, i cili garonte edhe 5 vite më parë, kur u zgjodh Aida Hajnaj. Në 2015-ën, ai shërbeu si specialist i marrëdhënieve ndërkombëtare në Interpol.
7 KANDIDATËT QË VAZHDOJNË GARËN:
- Andi Pogaçe
- Artur Beu
- Elton Kërluku
- Gentian Ndoi
- Gentjan Shehaj
- Gledis Nano
- Joni Keta
Gjatë kësaj faze që sapo u mbyll, Komisioni i Përzgjedhjes i përbërë nga prokurorët e SPAK përbërë nga Altin Dumani, Arben Kraja dhe Behar Dibra, ka shqyrtuar dokumentacionin e paraqitur nga kandidatët për të vlerësuar përmbushjen e kushteve ligjore dhe kritereve të përcaktuara në ligjin “Për organizimin dhe funksionimin e institucioneve për të luftuar korrupsionin dhe krimin e organizuar”.
Shtatë kandidatët që kalojnë këtë fazë, do të ftohen për të marrë pjesë në fazat pasardhëse të procesit. Procesi i emërimit të drejtorit të ri do të kryehet duke kaluar në 7 faza, testi i arsyetimit logjik, kontrolli mjekësor, testi fizik, ese me shkrim, intervistë dhe më pas bëhet verifikimi i figurës, deklarimi i aseteve dhe testi i poligrafit.
Mediat kanë raportuar për një garë të paracaktuar, pasi dy kandidatët favoritë për të marrë postin e drejtuesit të BKH-së janë Joni Keta dhe Elton Kërluku, e cila ka sjellë edhe një pëarplasje mes Altin Dumanit dhe Arben Krajës.
Drejtueses aktuale të BKH-së, Aida Hajnajt, i përfundon mandati 5-vjeçar më 31 Gusht. Edhe pse kishte shprehur që më 28 mars interesin për një tjetër mandat, ajo u përjashtuar nga e drejta për rikandidim, pasi nuk dorëzoi dokumentacionin e kërkuar brenda afatit të caktuar nga Komisioni i Përzgjedhjes deri më 7 maj.
