Parlamenti i Iranit ka votuar në favor të pezullimit të bashkëpunimit me Agjencinë Ndërkombëtare për Energjinë Bërthamore (IAEA), sipas raportimeve nga mediat shtetërore iraniane.
Kryetari i parlamentit, Mohammad Bagher Ghalibaf, akuzoi IAEA-në se ka dështuar të dënojë sulmet izraelite dhe amerikane ndaj objekteve bërthamore të Iranit.
Sipas Ghalibaf, autoritetet bërthamore të vendit “do të pezullojnë bashkëpunimin me IAEA-në derisa të garantohet siguria e objekteve bërthamore iraniane”.
Ai shtoi gjithashtu se programi bërthamor paqësor i Iranit “do të përparojë me një ritëm më të shpejtë”.
Megjithëse votimi ka karakter simbolik dhe nuk përbën ende politikë zyrtare, masa duhet të miratohet nga figurat e larta të udhëheqjes iraniane për të hyrë në fuqi.
Që prej ditës së djeshme, Irani dhe Izraeli janë në armëpushim me ndërmjetësimin e Presidentit amerikan Donald Trump.
