Presidentja e Komisionit Evropian, Ursula von der Leyen, gjatë fjalës së saj në Samitin e NATO-s për Forumin e Industrisë së Mbrojtjes, deklaroi se Evropa e mbrojtjes “më në fund është zgjuar”. Ajo përshkroi objektivin e NATO-s për shpenzimet prej 5% të buxhetit të vendosur për mbrojtjen si një hap “historik”.
Von der Leyen theksoi se arkitektura e sigurisë që është përdorur për dekada nuk mund të merret më si e mirëqenë, duke përshëndetur iniciativat e reja evropiane për forcimin e mbrojtjes. Ajo iu referua Planit “ReArm Europe 2030”, i cili parashikon investime prej 650 miliardë eurosh në katër vitet e ardhshme, si dhe instrumentit financiar SAFE me 150 miliardë euro kredi për prokurim të përbashkët në mbrojtje.
Presidentja nënvizoi rëndësinë e krijimit të kushteve për që industria e mbrojtjes të funksionojë me shpejtësi dhe në shkallë të madhe, duke përmendur kreditë SAFE që stimulojnë kontratat afatgjata dhe bashkëpunimin ndërkombëtar, ku përfshihen jo vetëm vendet anëtare të BE-së, por edhe partnerë si Ukraina, Mbretëria e Bashkuar, Kanadaja dhe Japonia.
Von der Leyen paralajmëroi se gjatë pesë viteve të ardhshme Rusia do të testojë kapacitetin mbrojtës të Evropës, ndaj theksoi nevojën që deri në vitin 2030 Evropa të ketë një “pengesë të besueshme” për mbrojtjen e saj.
Ky mesazh vjen në një kohë kur Europa po intensifikon bashkëpunimin në fushën e mbrojtjes përballë sfidave globale dhe kërcënimeve të reja në siguri.
