Gazetari Osman Stafa bën të ditur se Brakiterapia është rikthyer në funksion në QSUT pas një ndërprerjeje, që prej datës 6 qershor, por jashtë çdo standarti.
Pajisja është vënë në punë pa kryer mirëmbajtjen e detyrueshme, pa ndjekur ciklin e testimeve teknike dhe kalibrimeve që kërkohen nga çdo standard ndërkombëtar i trajtimit onkologjik me rrezatim.
Kjo pajisje e vënë në punë jashtë çdo standarti është kërcënim i drejtpërdrejtë për jetën e pacienteve që marrin trajtim me Kobalt-60, një burim rrezatimi me fuqi të lartë, i cili, nëse nuk rikthehet në pozicionin e sigurt pas përfundimit të ekspozimit, mund të mbetet brenda trupit të një pacienteje, duke shkaktuar dëme të parikuperueshme në inde dhe, në rastin më të keq, vdekje.
Teksa iu drejtohet fizikantëve mjekësorë, gazetari thekson se “të pranojnë të punojnë me një pajisje pa mirëmbajtje të dokumentuar, pa teste të kryera dhe pa certifikim funksional, është të pranojnë të luajnë me jetën e pacientëve dhe të bëhen bashkëfajtorë në një rrezik të heshtur.
Gazetari thekson se “shëndetësia nuk funksionon me “urdhra”, por me protokolle, integritet dhe mbi të gjitha, me ndërgjegje profesionale”.
Postimi i plotë i Osman Stafës:
Brakiterapia është rikthyer në funksion në QSUT pas një ndërprerjeje, që prej datës 6 qershor. Por ky nuk është një lajm i mirë në vetvete. Pajisja është vënë në punë pa kryer mirëmbajtjen e detyrueshme, pa ndjekur ciklin e testimeve teknike dhe kalibrimeve që kërkohen nga çdo standard ndërkombëtar i trajtimit onkologjik me rrezatim.
Dhe kjo nuk është thjesht një mungesë procedure. Është një kërcënim i drejtpërdrejtë për jetën e pacienteve që marrin trajtim me Kobalt-60, një burim rrezatimi me fuqi të lartë, i cili, nëse nuk rikthehet në pozicionin e sigurt pas përfundimit të ekspozimit, mund të mbetet brenda trupit të një pacienteje, duke shkaktuar dëme të parikuperueshme në inde dhe, në rastin më të keq, vdekje.
Në këtë situatë, fizikantët mjekësorë kanë përgjegjësinë më të madhe. Ata nuk janë teknikë që thjesht ndjekin udhëzime. Ata janë garantët e sigurisë së trajtimit. Të pranojnë të punojnë me një pajisje pa mirëmbajtje të dokumentuar, pa teste të kryera dhe pa certifikim funksional, është të pranojnë të luajnë me jetën e pacientëve. Është të bëhen bashkëfajtorë në një rrezik të heshtur, që nesër mund të kthehet në përgjegjësi penale.
Standardet ndërkombëtare, nga IAEA, AAPM, deri te ESTRO, janë të qarta. Pajisjet e brakiterapisë me burim Kobalt-60 kërkojnë mirëmbajtje ditore, javore, mujore dhe vjetore. Kërkojnë testime të pozicionit të burimit, kohës së transitit, dhe funksionimit të sistemit në çdo nivel. Asgjë nga këto nuk mund të anashkalohet. Dhe asgjë nga këto nuk mund të zëvendësohet me “urdhra gojorë”.
Nëse një ditë ndodh e pakthyeshmja, nëse një paciente pëson një incident nga një burim që nuk është tërhequr, përgjegjësia do të jetë penale. Dhe ajo do të rëndojë mbi të gjithë zinxhirin e heshtjes, që nga drejtuesit, tek fizikantët që heshtin, deri tek ata që zbatojnë pa pyetur.
Ky është një apel, por edhe një paralajmërim i ndershëm: kushdo që lejon funksionimin e pajisjes pa protokollet e sigurisë, mban përgjegjësi për çdo pasojë. Dhe nuk do të ketë justifikim.
Shëndetësia nuk funksionon me “urdhra”. Ajo funksionon me protokolle. Me integritet. Dhe mbi të gjitha, me ndërgjegje profesionale.
