Në zonën e Malit të Robit e deri te rrethrrotullimi në Golem, disa banorë raportojnë raste të shumta helmimesh të qenve, një situatë alarmante që ka tronditur komunitetin.
Sipas një qytetari, në disa pjesë të pyllit janë gjetur kafshë të ngordhura, ndërsa helmi është hedhur qëllimisht për të eliminuar qentë.
Në mesazhin e tij për “JOQ“, qytetari e konsideron këtë akt çnjerëzor dhe thekson rrezikun që paraqet për kafshët shtëpiake të banorëve të zonës. Qytetari shkruan se Mali i Robit është i mbushur plot me plehra gjë që favorizon shtimin e qenve endacakë që mbijetojnë nëpër plehra, por kjo nuk e justifikon helmimin e tyre, zgjidhja e vetëm është pastrimi i ambientit nga bashkia dhe hapja e një qendre për qentë endacakë.
“Ne Malin e Robit kane hedhur helm per qentë. Vec këtu deri te rrethi ne Golem eshte hedhur helm, ku shume qen janë helmuar. Këtu mali i robit eshte me plehra dhe bashkia nuk i pastron. Zgjidhja nuk eshte te eliminosh qentë, por te hapesh nje qendër per ta, ose te pastrosh ambientin nga mbeturinat. Ketu eshte skandal, i piset. Ky eshte nje qen ne pyll, po keto dit situata tek mali i robit ka qen skandal, plot me qen te ngordhue verdall. Nga ky helm janë prekur shume qen, madje dhe qeni im qe shyqyr Zotit e dërgova te veterineri sa pashe shenjat e para. Bashkia duhet te zgjidhe problemin te pastroje zonën, jo te eliminoje qentë”, shprehet qytetari, banor ne zonën e Malit te Robit.
Në këto kushte, kërkohet ndërhyrje e menjëhershme e bashkisë Kavajë me kryebashkiak Fisnik Qosen për pastrimin e zonës dhe ngritjen e një qendre strehimi për qentë endacakë. Qasja e deritanishme e autoriteteve është jo vetëm joefektive por edhe rrezik për shëndetin publik dhe akt mizor kundrejt kafshëve.
