Deputetja e Partisë Demokratike, Jorida Tabaku, ka reaguar për rritjen çmimeve në Shqipëri, duke e quajtur këtë një realitet të padrejtë për qytetarët.
“Sot Shqipëria konkurron me Bashkimin Europian vetëm për çmime!” – deklaron Tabaku.
Ajo nënvizon se sipas të dhënave zyrtare për vitin 2025, çmimet për produktet bazë si djathi, qumështi, vezët dhe vaji janë përkatësisht 25-30% më të larta se mesatarja e BE-së. Ndërkohë, karburanti mbetet ndër më të shtrenjtët në rajon, duke arritur çmime që kapin kufirin e 2 dollarëve për litër – të barabarta me ato të Zvicrës.
Tabaku thekson kontrastin e thellë mes standardit të jetesës në vend dhe niveleve europiane, duke rikujtuar se të ardhurat për frymë të shqiptarëve janë vetëm 40% e mesatares së BE-së. “Ky është realiteti shqiptar: paga afrikane, çmime europiane!”, deklaron ajo.
Sipas saj, zgjidhja qëndron te kontrolli i tregjeve, hapja ndaj konkurrencës dhe përmbysja e modelit ekonomik të kapur nga pakica. Ajo kërkon që ekonomia të rikthehet në shërbim të shumicës dhe të familjeve shqiptare që sot përballen me barrën më të rëndë ekonomike në rajon.
“Përse qytetarët shqiptarë duhet të paguajnë më shumë se europianët për të njëjtat produkte, kur kanë më pak të ardhura?”, pyet Tabaku, duke e mbyllur me një thirrje të qartë: Kjo duhet ndryshuar.
