Presidenti i SHBA-së, Donald Trump sapo ka postuar në rrjetet sociale, duke bërë dy reagime të njëpasnjëshme lidhur me konfliktin Izrael-Iran.
Fillimisht presidenti amerikan shkruan se Izraeli me avionët të prodhimit amerikan ka në kontroll të plotë qiellin e Iranit.
“Tani kemi kontroll të plotë dhe total të qiellit mbi Iranin. Irani kishte sisteme të mira gjurmimi qiellor dhe pajisje të tjera mbrojtëse, dhe me shumicë, por nuk krahasohet me ‘gjërat’ e prodhuara, të konceptuara dhe të prodhuara nga Amerika. Askush nuk e bën këtë më mirë se SHBA-ja e vjetër dhe e mirë.”
Më pas Trump, shkruan: “Dorëzim pa kushte”.
Çfarë po ndodh mes Izraelit dhe Iranit?
• Izraeli dhe Irani po shkëmbejnë sulme prej pesë ditësh, ndërsa civilët në zonat e tensionuara po përballen me valë bombardimesh. Në Iran janë vrarë të paktën 224 persona që nga fillimi i përplasjes. Në Izrael, numri i të vrarëve ka arritur në 24.
• Presidenti amerikan Donald Trump ka deklaruar se po kërkon një “përfundim të vërtetë” të konfliktit, jo thjesht një armëpushim, pasi u largua para kohe nga samiti i G7. Trump mohoi se u largua për të punuar për një marrëveshje paqeje dhe tha se “diçka shumë më e madhe” është në zhvillim. Ai gjithashtu u ka bërë thirrje iranianëve të evakuojnë Teheranin.
• Ndërkohë, Kryeministri izraelit Benjamin Netanyahu ka deklaruar se beson se sulmet e Izraelit e kanë dëmtuar ndjeshëm programin bërthamor të Iranit. Izraeli ka goditur tre objekte kryesore bërthamore iraniane, megjithëse shkalla e dëmeve mbetet e paqartë.
