Hakan Çalhanoglu mund të jetë protagonist i një prej lëvizjeve më të përfolura të merkatos së ardhshme.
Mesfushori turk, i cili është nën kontratë me Interin deri në vitin 2027, po ndiqet nga disa klube, dhe skuadra zikaltër nuk do të ishte kundër shitjes nëse oferta arrin një shumë të konsiderueshme.
Al-Hilal nga Arabia Saudite, një nga klubet më të fuqishme financiarisht në Gjirin Persik, i është bashkuar garës për të siguruar shërbimet e mesfushorit turk.
Nga rrethi i lojtarit pranohet se ka interes edhe nga Turqia, në veçanti nga Galatasaray — klub për të cilin Çalhanoglu ka deklaruar më parë se është tifoz.
Megjithatë, skuadra saudite pritet të paraqesë një ofertë më ambicioze, si në aspektin financiar ashtu edhe në atë sportiv, që mund të ndikojë në vendimin përfundimtar të lojtarit.
Interi nuk është në nxitim për ta larguar njërin nga lojtarët më të besueshëm të skuadrës (me 11 gola dhe 8 asistime në 47 ndeshje sezonin e fundit), por do të ishte e gatshme të negociojë nëse oferta lëviz në intervalin 35–40 milionë euro, sipas “Mundo Deportivo”.
Kjo shumë konsiderohet e arsyeshme duke marrë parasysh performancën dhe vlerën aktuale në treg të lojtarit. Nëse transferimi finalizohet, Interi do të përfitonte një shumë të konsiderueshme për një lojtar që tashmë ka kaluar të tridhjetat.
Gjithsesi, vendimi përfundimtar pritet të varet nga vullneti i vetë Çalhanoglu dhe përpjekja konkrete e ofertuesve për ta bindur.
