Mungesa e ftesës në kombëtaren e madhe të Gjermanisë afron Brajan Grudën akoma dhe më shumë me Shqipërinë.
Lajmi është konfirmuar nga trajneri i 21-vjeçarëve kuqezi, Alban Bushi. Në studion e Klan News Sport, Bushi ka pranuar se ka një marrëveshje verbale me Grudën që të vishet kuqezi nëse mbetet jashtë planeve të teknikut, Julian Nagelsmann.
“Brajan Gruda mund të luajë te Shqipëria me 100% në qoftë se nuk është pjesë e kombëtares së Gjermanisë A. Në momentin që nuk është pjesë e saj, ai do të përfaqësojë Shqipërinë. Ky ka qenë bashkëbisedim, kontakt ose le të themi, ne kemi bërë takimet me familjen e tij.
Ne do të donim shumë që të ishte pjesë e Shqipërisë. Faktikisht është një lojtar me potencial shumë të madh dhe një lojtar që i mungon Shqipërisë, pra që futet gjithmonë nga brenda dhe futet me të majtën që nuk e kemi, dhe këta lojtarë si Gruda bëjnë diferencën në një ndeshje futbolli, fitojnë ndeshjen”, tha Bushi.
Aktualisht Brajan Gruda është i grumbulluar me Gjermaninë U-21 në kampionatin europian që po zhvillohet për këtë grupmoshë dhe nuk dihet nëse bëhet fjalë për shtatorin, apo Brajan Gruda do vazhdoje akoma ta “zvarrisë” Shqipërinë me shpresën se do i vijë një ftesë nga Gjermania A.
