Ish-drejtoresha e INSTAT, Ines Nurja ka ngritur alarmin mbi përkeqësimin e strukturës së popullsisë në Shqipëri, duke theksuar se vendi po përballet me plakje të përshpejtuar dhe largim masiv të të rinjve.
“Sot Shqipëria po plaket me ritme shumë të shpejta. Largimet më të mëdha janë nga grupmosha 20–39 vjeç, që përbën 54% të popullsisë së larguar,” u shpreh Nurja në emisionin “Log.” në News24, duke theksuar se ky fenomen është i përhapur në të gjithë vendin.
Sipas saj, Tirana është i vetmi qark që arrin të zbusë disi ndikimin e plakjes, por situata në pjesën tjetër të vendit është tejet shqetësuese. “Në qarqet e tjera mbi 50% e popullsisë janë mbi 50 vjeç. Kjo tregon se kemi një piramidë demografike të përmbysur,” paralajmëroi ajo.
Nurja shtoi se dy faktorët kryesorë që kanë sjellë këtë situatë janë emigracioni masiv dhe rënia e lindshmërisë, duke krijuar një efekt të dyfishtë negativ në strukturën e popullsisë.
“Nëse nuk merren masa të menjëhershme për të frenuar këto ritme, ndikimi në zhvillimin ekonomik dhe social do të jetë i thellë dhe afatgjatë,” tha Nurja.
