Presidenti i SHBA-ve, Donald Trump, ka reaguar ashpër ndaj autoriteteve vendore të Kalifornisë, pas përplasjes së fundit me protesta të dhunshme në Los Angeles. Në një postim të publikuar në rrjete sociale, Trump deklaron se ndërhyrja e Gardës Kombëtare ishte vendimtare për të shmangur shkatërrimin e plotë të qytetit.
Në deklaratën e tij, Trump kritikoi ashpër guvernatorin e Kalifornisë, Gavin Newsom, dhe kryetaren e bashkisë së Los Anxhelosit, Karen Bass, të cilët ai i përshkruan si “jashtëzakonisht të paaftë”.
Sipas tij, të dy liderët lokalë po mashtrojnë qytetarët duke e paraqitur situatën si “protesta paqësore”, ndërkohë që sipas Trump, qyteti ishte në prag të shkatërrimit total.
“Ne morëm një vendim të shkëlqyer duke dërguar Gardën Kombëtare për të përballuar trazirat e dhunshme dhe të nxitura në Kaliforni. Po të mos e kishim bërë, Los Angeles do të ishte shkatërruar plotësisht,” shkroi Trump.
Ai ironizoi më tej guvernatorin dhe kryetaren e bashkisë, duke pretenduar se ata duhet të kishin thënë: “Faleminderit, President Trump, ju jeni aq i mrekullueshëm. Ne do të ishim asgjë pa ju, zoti President.”
Në të njëjtin postim, Trump theksoi vendosmërinë për të ndërhyrë kurdoherë që qytetarët amerikanë janë në rrezik, duke e përmbyllur me sloganin e tij të njohur: “Do të bëjmë Amerikën sërish të madhe!”
