Kombëtarja shqiptare do të presë mbrëmjen e nesërme, në stadiumin “Arena Kombëtare” përfaqësuesen e Serbisë, me ndeshjen që do të fillojë në 20:45. Këta të fundit do të udhëtojnë paraditen e sotme për në Tiranë, teksa do të zhvillojnë pasdite seancën e fundit zyrtare në stadiumin ku do të luhet ndeshja.
Sa i përket akomodimit, federatës serbe i është sugjeruar që skuadra të qëndrojë afër stadiumit, por për arsyet e tyre, diçka e tillë nuk është pranuar. Kështu, ekipi dhe delegacioni i Serbisë do të akomodohen në afërsi të pallatit me shigjeta.
Sot, kur do të zhvillohet edhe konferenca apo stërvitja përpara ndeshjes, apo edhe ditën e ndeshjes, autobusi i ekipit të Serbisë do të shoqërohet me eskortë policie. Ndërkohë, në zonën rreth stadiumit do të vendoset një perimetër sigurie, për të parandaluar ndonjë surprizë që mund të shkaktojë incidente.
