Gjykata e Posaçme ka pranuar pjesërisht kërkesën e SPAK për konfiskimin e pasurive të Indrit Veizit dhe familjarëve të tij.
Më konkretisht, ka vendosur t’i konfiskojë 5 pasuri, të cilat dyshohet se i ka përfituar nga burime të paligjshme, teksa i ka liruar nga sekuestro 4 të tjera.
Indrit Veizit i janë konfiskuar një autobus i markës “Volvo”, një makinë e markës “Mercedes Benz S300”, një trailer dhe aksionet në dy kompani, teksa i janë liruan nga sekuestro dy apartamente, një tokë arë dhe një automjet, nëpërmjet revokimit të masës.
Vendimi është dhënë nga gjyqtarja Flojera Davidhi, pas kërkesës së depozituar nga SPAK, se këto pasuri dhe asete vinin nga aktivitete kriminale të Indrit Veizit në fushën e krimit të organizuar, trafikut, korrupsionit dhe krimeve të tjera, me burime të paligjshme.
9 pasuritë ishin vendosur nën sekuestro nga SPAK që prej vitit 2023.
Pasuritë e konfiskuara:
-Automjetit autobus, i markës Volvo, me ngjyrë të zezë, i vitit të prodhimit 1998 në emër të Indrit Vezi
-Automjetit autoveturë, i markës Mercedes Benz S300, me ngjyrë të zezë, i vitit të prodhimit 1998, në emër të Indrit Vezi
-Trailer, me Kontratë shitblerje, me palë blerëse D.V, në emër të Shoqërisë DYLAVER VEZI Shpk me NIPT Nr. L2114503K, për blerje automjeti e llojit gjysmë rimorkio e markes KRONE SD K, me vlerë transaksioni 11.000,00 Euro.
-Kuotat si ortak në shoqërinë “TRANS KOMOD” Sh.p.k me numër NUIS (Nipti) L62420503D.
-Firmën si person fizik DYLAVER VEZI me numër NIPTI L62114503K dhe ushtrim aktivitetit Durres, Lagjia nr.14 Shkozet se bashku me asetet e kesaj kompanie
U revokua sekuestro për pasuritë:
-Pasuri Apartament, me sipërfaqe prej 103 m2 e Indrit Vezi, në Tiranë
-Pasuri Apartament, me sipërfaqe prej 51 m2 e D.V dhe E.V, ku vlera e pasurisë fillestare është 34.000 Euro.
-Pasuri Arë, me sipërfaqe prej 1809 m2 në pronësi të shtetasit S.V.
-Automjetit autoveturë, i markës Daimler Benz, me ngjyrë blu, i vitit të prodhimit 1997, në emër të Indrit Vezi, pasi rezulton të jetë e shtetasit K.R.
