38 persona janë arrestuar për komplot nga autoritetet e Venezuelës këtë të martë, ku mes tyre është edhe shqiptari Enid Kasmi.
Mediat venezuelase shkruajnë se Kasmi merrte pagesa nga Shtetet e Bashkuara për të kryer veprime destabilizuese dhe të dhunshme.
Nga 38 të arrestuarit, 21 janë shtetas venezuelas, ndërsa 17 të tjerë janë shtetas ukrainas, meksikanë.
Vetë presidenti Nicolas Maduro hodhi akuza ndaj mafias shqiptare kur tha se e kanë pasur plan për të sabotuar zgjedhjet rajonale dhe legjislative të dielën e ardhshme në vendin e Karaibeve. “Mafia shqiptare, që sundon Ekuadorin, dërgoi disa nga mercenarët e saj të trajnuar për të vendosur bomba në Venezuelë. Mafia shqiptare është kapur, i kemi, u janë sekuestruar tre telefona dhe po flasin”, tha ai.
Ndërsa ministri i Brendshëm, Drejtësisë dhe Paqes, Diosdado Cabello , denoncoi një tentativë të re sulmi të kryer nga opozita ekstremiste venezuelase me qëllim destabilizimin e vendit dhe sabotimin e zgjedhjeve të planifikuara për të dielën, më 25 maj, të udhëhequr nga Iván Simonovis , ish-oficeri i FANB-së, Arturo José Gómez Morante dhe anëtarja e opozitës María Corina Machado .
Në një konferencë për shtyp të mbajtur zyrtari për sigurinë në Venezuelë tha se grupi prej tetë vetash vendas u kap me pajisje shpërthyese, “atë që ata e quajnë detonatorë elektrikë”.
