Gjykata e Tiranës ka pranuar pretencën e Prokurorisë për dënimin me tre burgime të përjetshme për vrasësin serial Dan Hutra, duke e shpallur fajtor për vrasjen e 3 grave dhe plagosjen e 3 të tjerave.
Një burgim të përjetshëm Dan Hutra e ka marrë për vrasjen e Mevlute Sadikut, një dënim të dytë të përjetshëm për vrasjen e Hasime Dafkut dhe të tretin për vrasjen e Etleva Kurtit.
Gjithashtu, togat e zeza e kanë dënuar Dan Hutrën dhe me 35 vite burgim për tentativën për vrasje ndaj Helena dhe Kujtime Hysës, si dhe me 30 vite burgim për plagosjen e rëndë të Marjana Gurakuqit. Po ashtu, ai është dënuar edhe me 15 vite burg për armëmbajtje pa leje dhe sigurimin e kushteve për të kryer vrasje.
Më 1 mars të vitit 2023, Dan Hutra, një ish-i dënuar për vrasjen e gruas së parë, kishte vetëm dy javë që ishte liruar nga qelia, ku mbahej për dhunë në familje që nga 16 qershori i vitit 2022.
Duket se në burg, ai kishte thurur planin e tij të hakmarrjes. Hakmarrje ndaj atyre që e kallëzuan, sipas tij me të padrejtë dhe ndaj atyre që ai mendonte se kishin tentuar ta vrisnin në burg. Më datën 1 mars 2023, nga ora 12:15 deri në orën 12:48 ai realizoi 3 vrasje e 3 plagosje në Tiranë. Të gjitha gra dhe vajza.
Nga “Pallati me shigjeta”, ku ka kryer plagosjen e Marjana Gurakuqit, ka vijuar rrugën për rreth 5.4 kilometra, duke shkuar në rrugën “Rrustem Haklaj”, në Kodër Kamzë. Aty ka vrarë Mevlute Hysën dhe Hasime Dafkun, si dhe ka plagosur Elena (Alketa) Hysën e Kujtime Hysën. Më pas, ka përshkuar edhe 3.4 kilometër deri në rrugën “Besëlidhja” në Bathore, ku ka vrarë Etleva Kurtin.
Pra distanca nga krimi i parë deri në atë të fundit është 8.8 kilometër. Ndërsa të gjitha ngjarjet Dan Hutra i ka realizuar për 33 minuta.
Dy të plagosurat, Elena Hysa është ish-bashkëjetuesja e Dan Hutrës, ndërsa Kujtime Hysa është nëna e Elenës. Ndërsa viktima Mevlute Hysa është motra e ish-bashkëjetueses së personit të dyshuar dhe Hasime Dafku është kunata, nusja e vëllait të Elena e Mevlute Hysa.
Marjana Gurakuqi u plagos me thikë nga Dan Hutra, pasi kishte pasur një lidhje intime me të. Ndërsa Etleva Kurtin e vrau, pasi pretendonte se vëllai i saj Vladimir Kurti, të cilin e kam pasur shok qelie në burg, kishte tentuar ta helmonte.
Në dëshminë e tij, Hutra pranoi krimet, duke deklaruar se i kishte planifikuar me vetëdije dhe se nuk i interesonte sa do të dënohej. Ai shprehu pendesë vetëm për vrasjen e Hasime Dafkut, e cila ishte shtatzënë.
