Një situatë e paprecedentë u shënua pasditen e sotme kur gazetarët zbuluan një zyrë sekrete të patronazhistëve të cilët vepronin në mënyrë të fshehtë në rrugën Marko Boçari në Tiranë.
Sapo panë kamerën, patronazhistët morën të gjitha materialet dhe u larguan me vrap duke u përpjekur të fshiheshin që të mos identifikoheshin.
Ndërkohë deputeti Erjon Braçe mbërriti dhe i kërkoi gazetares së Syri TV të largohet. Për disa momente pati përplasje dhe mes përfaqësuesit të PD-së dhe Erion Braçes.
“Ti dhe ky banditi këtu. Mu zhduk po të them! Nuk po të llogaris” i thotë Braçe gazetares dhe përfaqësuesit të PD.
“Pse jeni në atë zyrë ku ka pasur persona të fshehur? Pse vini fshehurazi? Mos më prek me dorë. A është zyrë e juaja apo jo. A është zyrë e PS-se pse vini fshehurazi”- pyet gazetarja.
Në disa momente ka pasur dhe përplasje fizike me një nga përfaqësuesit e PD-së Olek Hanku që ka bërë denoncimin në polici.
“Ik ore copë mishi mos të shoh këtu”– i drejtohet Braçe.
Në vendin e ngjarjes ka shkuar me urgjencë drejtuesi politik i PD Belind Këlliçi i cili ka bërë denoncimin në policinë e kryeqytetit.
