Prokuroria e Posaçme (SPAK) ka përfunduar hetimet paraprake për kandidaten e PS-së në Fier, Zegjine Çaushi dhe ia ka kaluar dosjen për hetim Prokurorisë së Fierit.
Bëhet fjalë për një audio-përgjim të publikuar rreth dy vite më parë nga një emision televiziv, ku Zegjine Çaushi, në kohën kur mbante postin e kryeinspektores së IVMT-së në Bashkinë e Roskovecit, i bënte presion dhe kërcënonte një qytetare për votën në zgjedhjet lokale të vitit 2023.
Në një komunikatë për mediat, SPAK thotë se ka dalë në konkluzionin se nuk jemi përpara veprës penale “korrupsion aktiv në zgjedhje”, por mund të jeni përpara rastit të konsumimit të 3 veprave të tjera penale që janë në kompetencë të Prokurorisë së Fierit.
Më konkretisht bëhet fjalë për dyshimet për kryerjen e veprave penale “Shpërdorimi i detyrës”, “Përdorimit të funksionit publik për veprimtari politike ose zgjedhore” dhe “Kanosje apo dhunim ndaj pjesëmarrësve në zgjedhje”.
SPAK thotë se për këtë arsye ka vendosur që të mos regjistrojë procedim penal për “korrupsion aktiv në zgjedhje”, dhe t’i kalojë dosjen Prokurorisë së Fierit që të kryejë veprime hetimore procedurale për këto 3 vepra penale të tjera.
Gjatë kësaj fushat ezgjedhore, Zegjine Çaushi, edhe pse 26 vjeçe, është bërë e njohuar pasi është promovuar nga mediat pranë Qeverisë për videot e saj me tekste qesharake ku ajo vë në lojë kundërshtarin e drejtpërdrejtë të Belinda Ballukut, Gazment Bardhin.
