Drejtësia boliviane ka rivendosur një urdhër arresti për “trafikim të të miturve” kundër ish-presidentit të vendit Evo Morales, i cili u anulua nga një gjykatë të mërkurën. Lajmin e njoftoi të premten Ministri i Drejtësisë Cesar Siles.
“Jo vetëm që urdhër-arresti është rivendosur,por “procesi, ndjekja penale” kundër ish-presidentit po vazhdon gjithashtu, tha z. Silas në televizionin shtetëror.
Sipas ministrit, një vendim i marrë nga gjyqtari Lilian Moreno u pezullua të paktën përkohësisht nga një gjyqtar në gjykatën rajonale të La Paz. Arsyeja e këtij pezullimi nuk është shpjeguar deri më tani.
Zyra e prokurorit kishte urdhëruar në tetor arrestimin e ish-presidentit i cili synon të kandidojë për një mandat të katërt si president në zgjedhjet e 17 gushtit.
Që atëherë, Morales iku në fortesën e tij në Chapare, në Bolivinë qendrore, ku policia nuk ndërmori kurrë një operacion për ta arrestuar atë. Ish-presidenti akuzohet për “trafikim” të një të miture për shkak të një marrëdhënieje që ai pati në vitin 2015 në këmbim të favoreve ndaj prindërve të saj.
Sipas prokurorisë, ai kishte një lidhje me adoleshenten 15-vjeçare dhe një vit më vonë ata patën një vajzë. Ish-presidenti i mohon akuzat në këtë rast, dhe avokatët e tij i kujtojnë se një hetim për të njëjtin rast u mbyll në vitin 2020.
Ai pretendon se është viktimë e “persekutimit gjyqësor” të motivuar politikisht, të nxitur nga qeveria e Presidentit aktual Luis Arce dhe ish-Ministri i tij i Ekonomisë.
Evo Morales synon të rizgjidhet president edhe pse Gjykata e Lartë konfirmoi në vitin 2024 ndalimin për çdo president që të mbajë një detyrë për më shumë se dy mandate.
