Tom Doshi vijon askuzat ndaj kryebashkiakut të Shkodrës, Benet Beci, gjatë kësaj fushate elektorale, të cilin e konsideron si një të infiltruar të Sali Berishës mes socialistëve.
Gjatë një mitingu në Velipojë, Tom Doshi akuzoi Benet Becin se po lejon ndërtime pa leje në atë zonë në këmbim të votave, teksa sulmoi edhe drejtorin e IKMT-së, si dhe një punonjës të OSHEE-së që sipas tij, po bëjnë presion për vota.
Tom Doshi ripërsëriti thirrjet ndaj SPAK-ut që të merret me krimet zgjedhore në Velipojë dhe në Bashkinë e Shkodrës.
“Nuk e paskemi njohur këtë që është në krye të bashkisë sot, pasi është i infiltruari i Sali Berishës. Për 2 vite nuk ka bërë asgjë në Velipojë përveçse ka prishur lokalet e ka bërë veç dëm. Kanë mbetur edhe 3 kaçatorra këtu, njëri është drejtor i IKMT-së, tjetri punon me OSHEE-në, që rrinë dhe bëjnë presion nëpër Velipojë. Është fatkeqësi e madhe që Velipoja të bjerë në dorë të tyre.
Po bëhen krime zgjedhore në Velipojë. Janë bërë ndërtime pa leje në këmbim të votave. Ju e keni parë se çfarë i ka ndodhur në Trush, një nëne me fëmijë jetimë, Benet Beci u ka nisur IKMT-në. Këtu në plazh ndërton pa leje dhe atje që është në mes të fushës në Trush, shkojnë dhe e pezullojnë dhe e gjobisin. Është kaq i lig, kaq i vogël saqë e çon veten të merret me fëmijë jetimë. I bëj thirrje BKH-së dhe SPAK-ut të vijë dhe të merret me krimet zgjedhore në Velipojë dhe në Bashkinë e Shkodrës.”, tha Doshi.
