Është nisur nga Emiratet e Bashkuara Arabe drejt vendit i shumëkërkuari i drejtësisë, Florenc Çapja alias Çopja, 44 vjeç, një prej anëtarëve të krimit të organizuar në qytetin e Elbasanit.
Lajmin për ekstradimin e tij nga Dubai e ka bërë me dije vetë Policia e Shtetit përmes një komunikate të shkurtër për mediat, ku njofton se ai pritet të mbërrijë në aeroportin e Rinasit pasditen e sotme.
Ende nuk dihet se me çfarë procedurash është bërë i mundur ekstradimi i Florenc Çapjas nga Emiratet e Bashkuara, pasi mes dy vendeve nuk ka ende një marrëveshje ekstradimi.
Burgim i përjetshëm për vrasjen e Gentian dhe Nezir Beqirit
Florenc Çapja alias Çopja është dënuar me burgim të përjetshëm për vrasjen e babë e bir, Gentian dhe Nezir Beqiri, ngjarja kjo e ndodhur më 15 gusht 2012 në qytetin e Elbasanit. Si porositës i kësaj vrasje të dyfishtë ndodhet në qeli dhe vuan dënimin me burgim të përjetshëm xhaxhai i tij, Ardian Çapja alias Çopja.
Gentian dhe Nezir Beqiri u ekzekutuan në shtëpinë e tyre në 15 gusht 2012, nga Jorgo Leku në bashkëpunim me Etien Canin. Ata ishin paraqitur në shtëpinë e Nezir Beqirit si miqtë e djalit, Gentianit i cili ndodhej i paralizuar dhe në arrest shtëpie, pas një përplasje me policinë pasi ishte në kërkim për një tjetër ngjarje të rëndë të ndodhur në Elbasan.
Etien Cani bashkë me Lekun, shkuan në shtëpinë e shokut të tyre Gentian Beqiri, duke përshëndetur policët e vendosur në hyrje të pallatit për të mbikëqyrur Nezirin. Ishte babai i shokut të tyre ai që i hapi derën pasi njohu shokët e djalit. Në atë moment Cani qëlloi me armë ndaj Beqirit duke e lënë të vdekur në vend.
Ngjarja u zbardh pas dëshmisë së të penduarit të drejtësisë Ervis Bardhi, i cili ka dëshmuar në procesin ndaj Ardian dhe Florenc Çapjes e të akuzuar të tjerë për vrasjen e Gentian e Nezir Beqirit.
Vrasja ndodhi për hakmarrje, pasi Gentian Beqiri ishte një ndër tre personat që ekzekutuan Sokol Çapjan në një lokal në dhjetor 2005 në Elbasan duke çelur kështu serinë e hakmarrjeve mes familjeve në këtë qytet.
Atentati i mbetur në tentativë ndaj Sokol Sanxhaktarit
Gjithashtu, Florenc Çapja alias Çopja akuzohet edhe si porositës i vrasjes së mbetur në tentativë ndaj Sokol Xanxhaktarit, dhëndri i ish-kryebashkiakut të Elbasanit Qazim Sejdini, ngjarje e zbardhur nga dëshmitë e të penduarit të drejtësisë, Nuredin Dumani në kuadër të operacionit “Plumbi i Artë”.
Në lidhje me këtë ngjarje, mbi Florenc Çapjan alias Çopjan janë ngritur akuzat për veprat penale:“Sigurim i kushteve dhe i mjeteve materiale për të kryer vrasje”, kryer në bashkëpunimin e posaçëm të “Grupit të strukturuar kriminal”, “Kryerje e veprave penale nga grupi i strukturuar kriminal dhe organizata kriminale”.
Akuzat edhe për atentatin ndaj Fadil Memës
Florenc Çapja ka një proces të hapur gjyqësor edyhe në lidhje me atentatin ndaj ish-efektivit të Rrugores Fadil Mema. Në lidhje me këtë ngjarje, kolegji i Gjykatës së Lartë prishi vendimin e Gjykatës së Elbasanit të muajit nëntor të vitit 2019.
Më datë 20 nëntor të vitit 2019, gjyqtari i Elbasanit në atë kohë, Tomor Kullolli vendosi pushimin e çështjes për Florenc Çapjan, duke e liruar këtë të fundit nga burgu. Në atë kohë, gjykata u shpreh se nuk ka prova të mjaftueshme për ta implikuar Çapjan në këtë ngjarje. Vendimi për pushim u mor në seancën paraprake, ku gjykata duhet të vendoste kalimin ose jo të dosjes për gjykim.
Vendimi që u mor nga Gjykata e Elbasanit u la në fuqi edhe nga Apeli i Durrësit, konkretisht nga gjyqtarja Anita Mici në 14 prill të vitit 2020. Gjykata e Lartë, pas rekursit të Prokurorisë vendosi t’ia rikthejë çështjen Gjykatës së Elbasanit në seancë paraprake për ta rigjykuar.
Fadil Mema i shpëtoi atentatit të vitit 2006 kohë kur ai ishte efektiv i Policisë Rrugore. Ai u qëllua në qytetin e Elbasanit dhe për këtë në atë kohë policia tha se kishte identifikuar si autor Florenc Çapjen. Ngjarja ndodhi në prani të familjarëve të efektivit të policisë, të cilët identifikuan edhe autorin. Fadil Mema u dërgua në spital dhe u mbijetoi plagëve të marra, ndërsa Florenc Çapja, dy orë pas ngjarjes, u prangos nga policia, por u lirua nga gjykatat.
Por, më 13 mars të vitit 2015 “hasmi” e gjeti Fadil Memën në Torino të Italisë dhe e ekzekutoi me 7 plumba pistolete poshtë shtëpisë së tij, në lagjen Mirafiori, në rrugën Pavese, në moshën 54 –vjeçare. Ai sapo kishte dalë nga shtëpia, siç bënte çdo natë për të shkuar në punë, kur vrasësit, të paktën dy sipas policisë italiane, e pritën me të shtëna armë.
