Partia Demokratike ka mbajtur paraditen e kësaj të enjteje një miting në Librazhd, ku drejtuesi politik i Elbasanit, Tomor Alizoti gjatë fjalës së tij, pati një paralajmërim edhe për ata që kërcënojnë qytetarët për t’u marrë votën më 11 Maj.
Alizoti i konsideroi ata si maskarenj dhe analfabetë, teksa i paralajmëroi se do i hanë të gjallë nëse prekin demokratët dhe u shkojnë qytetarëve nëpër shtëpia natën. Më pas, Alizoti i dha fjalën Sali Berishës, duke u shprehur se prej tij kanë më shumë frikë.
“Çdo e vërtetë ka nevojë për guximtarë. Partia Demokratike është partia e guximtarëve. Një mesazh për ju që jeni jashtë dhe jeni cepave. Ju që i shkoni njerëzve nëpër shtëpia për t’iu marrë votat. Mos harroni se ne kemi mundur baballarët tuaj që kishin tanke, kishin ushtri, e kishin Polici. Juve do t’iu hamë të gjallë nëse prekni demokratët, nëse veni mina nuk do t’iu ndahemi kudo që të jeni. Ju që doni të shkatërroni Shqipërinë, ju analfabetë, ju maskarenj, do t’iu hamë të gjallë. Mos guxoni t’iu shkoni njerëzve nëpër shtëpia natën. Mos guxoni të fusni duart ditën e zgjedhjeve sepse liria e njerëzve është e shenjtë. Doktor jepi se ty të kanë më shumë frikë.” – u shpreh Alizoti.
