Një shpërthim me tritol është regjistruar mesnatën e kaluar, rreth orës 00:05, në qytetin e Elbasanit.
Shpërthimi ka ndodhur në hyrje të apartamentit të shtetasit A. P., i cili ndodhej në katin e parë të një pallati në lagjen “Partizani”, përgjatë rrjedhës së përroit të Zaranikës.
Në momentin e shpërthimi raportohet se nuk ka patur persona në banesë dhe janë shkaktuar vetëm dëme materiale, më konkretisht thyerja e xhamave të apartamentit.
Policia e Elbasanit ka sekuestruar pamjet filmike të kamerave të sigurisë, ku ka rezultuar se lënda plase është vendosur nga një burrë, i cili ka qarkulluar gjatë mbrëmjes disa herë para hyrjes së apartamentit të katit të parë të pallatit ku ndodhi shpërthimi.
Policia thotë se grupi hetimor, nën drejtimin e Prokurorisë, vijon veprimet me qëllim zbardhjen e rrethanave, identifikimin dhe kapjen e autorit/ve.
