Kolegji i Posaçëm i Apelimit, KPA vendosi të martën më 29 prill të lërë në fuqi shkarkimin nga detyra të prokurorit të Elbasanit, Mustafa Turku.
Vendimi u mor në mënyrë unanime nga trupi gjykues i KPA I kryesuar nga Rezarta Schuetz, me relatore Ina Rama dhe anëtarë Mimoza Tasi, Natasha Mulaj e Sokol Çomo, pas shqyrtimit në dhomë këshillimi të ankimit të Turkut kundër vendimit të Komisionit. Vendimi i Kolegjit është përfundimtar dhe ka efekt të menjëhershëm.
Komisioni i Pavarur i Kualifikimit, KPK, vendosi më 26 tetor të vitit 2023 të shkarkojë nga detyra prokurorin Mustafa Turku, pasi u konkludua se kishte kryer deklarim të pasaktë e të pamjaftueshëm për pasurinë, si dhe kishte cënuar besimin e publikut me veprimet dhe mosveprimet e tij në dy çështje.
Ndërkohë, prokurori Turku mori vlerësim pozitiv për pastërtinë e figurës. Mustafa Turku e fillloi karrierën në sistemin e drejtësisë në vitin 1986. Ai punoi prej më shumë se dy dekadash si prokuror në Prokurorinë e Elbasanit.
