Kandidatja e PD për Qarkun e Dibrës, Denisa Vata ka denoncuar asflatin elektoral që kryebashkiakja e Klosit, Valbona Kola, dhe zyrtarët e saj po hedhin në fshatrat e kësaj bashkie, përmes taksave të qytetarëve.
Krahas fotove ku denoncon krimin elektoral, Vata shprehet se zyrtarët bashkiakë të Bashkisë Klos, e kanë kthyer pushtetin në pronë private.
Siç shihet edhe në foton e mëposhtme, në Xibër, administratori Elton Dalliu, në vend që të shërbejë per fshatin, ka shtruar asfalt vetëm për veten.
Sipas Vatës, këta janë hajdutë me vula zyrtare, ndaj për këtë kandidatja e PD, kërkon nga SPAK të veprojë menjëherë dhe të ndalë ‘turpin kombëtar’.
“Në Klos, po kryhet një krim elektoral i pastër! Kryetarja e Bashkisë përdor taksat e qytetarëve për të shtruar asfalt mashtrimi që shpërbëhet brenda javës, duke vjedhur në mënyrë të pacipë paratë publike! Në Xibër, administratori Elton Dalliu, në vend që të shërbejë per fshatin, shtron asfalt luksi vetëm për veten, duke kthyer pushtetin në pronë private! Këta nuk janë drejtues, janë hajdutë me vula zyrtare! I bëjmë thirrje SPAK të veprojë tani për të ndalur këtë turp kombëtar!”- deklaron Vata.
