Hetimet e SPAK për Erion Veliaj kanë çuar hetuesit e BKH-së në Bashkinë e Fierit për një tender të dyshuar abuziv.
Bëhet fjalë për tenderin e vitit 2021 që titullohet “Konsulencë e jashtme për propozim ligjesh”, me vlerë 24 mijë euro, për të cilin Boldnews.al ka raportuar edhe më herët.
Bashkia e Fierit, nën drejtimin e socialistit Armando Subashi, ka sajuar tenderin në fjalë, fonde të cilat përfunduan përmes OJF-ve tek njerëzit e lidhur me Ajola Xoxën, bashkëshorte e Erion Veliajt.
Sipas bisedave të administruara nga SPAK-u, rezulton se bashkëpunëtoret e Xoxes, shtetaset Ines Dani dhe Adela Kondakçiu, diskutojnë ndër të tjera, edhe për pagesën prej 24 mijë eurosh të tenderit Bashkisë së Fierit.
Ky projekt i është dhënë “Personit Fizik-Ines Dani”, por ndërkohë, kjo e fundit rezulton se nuk ka patur asnjë dijeni që ka qenë fituese e këtij fondi.
Mediat raportojnë se prokurori i SPAK Ols Dado në raportimin në GJKKO për procesin hetimor pas dy mujsh pas lëshimit të masave të sigurisë për dosjen e Veliajt, ka listuar edhe disa gjetje të marra nga hetimi për këtë rast.
Raportohet se një tjetër provë e re hetimore që është shtuar së fundmi në informacionin 2 mujor është edhe komunikimi që Veliaj ka pasur me disa persona nga telefoni i një prej efektivëve të Policisë së Burgjeve.
Prokuroria ka administruar të dhëna shtesë mbi telefonatën që Veliaj ka kryer për të cilën i është komunikuar edhe vepra penale e “futjen e sendeve të ndaluara në qelitë e paraburgimit”.
Këto prova të reja janë lexuar gjatë seancës së mbajtur të mërkurën në GJKKO, teksa avokatët e Veliajt kërkuan kohë dhe seanca u shty për më 23 Prill ku ata do të bëjnë kundërshtimet e tyre, si dhe do të kërkojnë lehtësimin e masës së sigurisë për kreun e Bashkisë së Tiranës.
Pas raportimit nga SPAK dhe mbrojtjes së avokatëve, GJKKO do të japë një vendim mbi rivlerësimin nëse ka vend për zbutje, zëvendësim apo revokim të masave të sigurisë ndaj personave nën hetim.
Aktualisht, në burg në lidhje me këtë dosje ndodhet vetëm kryebashkiaku Erion Veliaj, ndërsa biznemsnei Elman Abule u la në “Arrest shtëpie” nga Apeli. Ajola Xoxa dhe biznesmenët Gentian Sula, Shkëlqim Fusha, Fatmir Bektashi, Meriman Palushi dhe Sokol Kryeziu, ndodhen nën masën e sigurisë “detyrim paraqitje”.
Erion Veliaj u arrestua mesditën e 10 Shkurtit në Bashkinë e Tiranës, teksa pas një hetimi 1 vjeçar, SPAK i ka ngritur akuzat për kryerjen e veprave penale “Korrupsioni pasiv i funksionarëve të lartë shtetërorë ose i të zgjedhurve vendorë”, kryer në bashkëpunim (9 herë) dhe “Pastrimi i produkteve të veprës penale ose veprimtarisë kriminale”.
Pas vendimit të Apelit, Erion Veliajt iu shtua edhe akuza e futjes së sendeve të ndaluara në qelitë e paraburgimit, pasi ishte në përgjim dhe zhvilloi telefonata me celularin e një prej efektivëve të Burgjeve, teksa ishte në fugon për t’u transferuar në burg.
Nga hetimi i SPAK ka rezultuar se Erion Veliaj dhe Ajola Xoxa kanë krijuar një skemë përfitimi ryshfetesh për pasurim personal përmes një numri organizatash dhe kompanish të kontrolluara prej tyre apo të afërmve të tyre dhe kanë përfituar së paku 1.1 milionë euro në nëntë raste. Veliaj akuzohet se ka përfituar tre vila në një fshat turistik në Qerret ndërsa Xoxa akuzohet se ka shpenzuar rreth 800 mijë euro në blerje online, të cilat nuk i ka deklaruar në deklaratat vjetore.
Biznesmenët Elman Abule, Gentian Sula, Shkëlqim Fusha, Fatmir Bektashi, Meriman Palushi dhe Sokol Kryeziu në këmbim të tenderave nga Bashkia e Tiranës dhe lejeve të ndërtimit, i ofronin Erion Veliajt, shuma monetare nëpërmjet blerjeve fiktive, biletave avioni, sponsorizimeve, OJF-ve të Ajola Xoxës, si dhe pasurive të paluajtshme, si disa vila në Qerret.
Aktualisht, Erion veliaj ndodhet në paraburgimin e burgut të Durrësit.
“Konsulencë për propozim ligjesh”, Subashi i Fierit sajoi tender 24 mijë euro për “grupin e Ajolës”
