Prokuroria e Tiranës ka nisur hetimet lidhur me ndërtimin e Këndit të Lojrave tek Parku i Liqenit.
Ajo ka ngritur dy akuza për projektin për veprat penale “ndërtim i paligjshëm” dhe “shpërdorim detyre”.
Pas një faze paraprake verifikimi, organi i akuzës ka vendosur të regjistrojë procedim penal për projektin që po ndërton Këndin e Lojrave. Fillimisht zëra nga Bashkia e Tiranës thanë se nuk do të hidhet asnjë centimetër beton. Ndërkohë, ishte shoqëria civile e cila filmoi dhe fotografoi betonieret që hidhnin beton në Parkun e Liqenit.
Burime jozyrtare nga Prokuroria thanë se procedimi është regjistruar fillimisht për veprat penale pa emrin e ndonjë personi konkret, pasi në vazhdim të hetimit do të shikohet përgjegjësia e personave nëse ka të tillë. Hetimi i prokurorisë ka nisur pas kallëzimit që shoqëria civile bëri në lidhje me projektin e Parkut të Lodrave te Liqeni Artificial.
Mësohet se objekti i hetimit është më i gjerë sesa vetë projekti, duke përfshirë edhe gërmimet që janë bërë në zonë, rrethimin e hapësirës ku shtrihet projekti, si dhe hedhjen e sasive të betonit dhe inerteve në fazën e deritanishme të punimeve që janë kryer atje. “Regjistrimi i procedimit ka ndodhur, pasi janë siguruar dyshime të bazuara se çështja ka vepra penale që duhen hetuar”, thanë burimet jozyrtare.
Hetimi
Në një deklaratë zyrtare të lëshuar disa ditë më parë në lidhje me hetimet për incidentet e ndodhura gjatë protestave te Liqeni, Prokuroria konfirmonte faktin se po hetohet edhe vetë projekti në fjalë. “Prokuroria po vijon hetimet për persona të tjerë të përfshirë në ngjarjen e datës 28.03.2016, ashtu edhe për ligjshmërinë e projektit të ndërtimit të këndit të lojërave në zonën e Liqenit Artificial, në bazë të kallëzimit të dorëzuar nga përfaqësues të shoqërisë civile”, thuhej në deklaratën e lëshuar nga zyra për median në Prokurorinë e Përgjithshme. Hetimi në fjalë mësohet se i është ngarkuar njësisë Task Forcë, Antikorrupsion në Prokurorinë e Tiranës. Burimet nga ky institucion kanë thënë dje vetëm se ka një proces hetimi për çështjen, por kanë refuzuar kategorikisht të japin detaje të mëtejshme. “Në fazën ku jemi nuk mund të japim asnjë informacion”, kanë thënë burimet e hetimit. Nga ana tjetër, mësohet se gjatë verifikimit paraprak, Prokuroria ka sekuestruar dokumentacionin e projektit në Bashkinë e Tiranës dhe në disa institucione të tjera dhe ministri.
