Presidenti i Interit, Beppe Marotta, ka vlerësuar punën e Simone Inzaghit pas kualifikimit në gjysmëfinalen e Champions League, duke e quajtur këtë sukses “burim krenarie për klubin, tifozët, pronarët dhe sidomos trajnerin”.
Sipas tij, kjo arritje është pjesë e një cikli të suksesshëm që ka nisur me mbërritjen e Inzaghit dhe që e ka bërë Interin protagonist në Europë dhe në Itali.
Marotta theksoi se ky sezon është shumë pozitiv, pavarësisht nga rezultati final, pasi skuadra është ende në garë për Champions, kampionat dhe Kupën e Italisë. Ai shtoi se Interi nuk duhet të vendosë limite për veten, sepse ka një histori të pasur dhe gjithmonë duhet të synojë fitoret në çdo kompeticion.
Në prag të ndeshjes vendimtare të së dielës kundër Bolognas, Marotta tha se kjo përballje është ndër më të rëndësishmet e sezonit, duke e cilësuar Bolognan si skuadrën më në formë të momentit.
Ai vlerësoi edhe më tej Simone Inzaghin, duke e cilësuar si trajner fitues, taktikisht i përgatitur dhe i aftë në menaxhimin e grupit. Marotta konfirmoi gjithashtu se klubi synon rinovimin e kontratës me të, për të shmangur hyrjen në vitin e fundit pa marrëveshje të re.
Në fund, ai foli për rindërtimin e marrëdhënies me Lautaro Martinezin, i cili ka nënshkruar një kontratë të re si shenjë përkatësie dhe lidershipi në skuadër. Lidhur me ëndrrën për të fituar Championsin, Marotta tha: “Është ndoshta e vetmja gjë që më mungon. Por ëndrrat shpesh realizohen. Kjo skuadër ka kapacitetin të na japë shumë kënaqësi.”
