Është shoqëruar me tensione dhe debate të forta seanca e sotme në GJKKO për të pandehurit e dosjes “Plumbi i Artë” me dëshmitë e të penduarit të drejtësisë, Nuredin Dumani.
Gjatë seancës, Nuredin Dumani iu drejtua avokatit Ilirian Dyzeni, mbrojtës i të pandehurit Besian Xhixha me fjalët “je në ofertë”, ku ai e ka marrë si kërcënim për ta vrarë.
Avokati u shpreh se nuk mundet që ta tolerojë që dikush ta kërcënojë në sallën e gjyqit dhe prokurori të bëjë sehir, duke mos reaguar fare dhe më pas braktisi sallën.
“Nuk toleroj mua të më kërcënojë dikush në sallë dhe prokurori të bëjë sehir, të mos reagojë. Nuk mund të më bëjë ai presion mua. Nuk dëgjoj unë atë të më thotë ‘të fus në listë, je në ofertë’”, ka deklaruar me tone të larta në seancë avokati.
Ai u largua menjëherë nga seanca, ndërsa situata ka krijuar kaos të përkohshëm në gjykatë. Ndërkaq gjykata urdhëroi punonjësit e policisë të largojnë nga salla të penduarin dhe ndërpreu seancën për pak minuta. Pas disa minutash seanca u qetësua dhe avokati Duzeni është rikthyer në sallën e gjyqit, për të rinisur procesi.
