Më 7 qershor të vitit 1999, dy shqiptarë u ekzekutuan me gjakftohtësi në Esen të Gjermanisë.
Altan B. dhe Alban M. u nxorën në pritë dhe u vranë. Të dy ishin shpërndarës droge dhe hetimi nuk arriti të zbulojë vrasësit e tyre.
Por tashmë, dekada më pas, dy detektivë në pension kanë vendosur që të rihapin dosjen e tyre.
Në fund të fundit, çështjet e vrasjeve nuk mbyllen kurrë. Detlef Buettner dhe Michael Detscher po bashkëpunojnë me një gazetar të ZDF për të zbardhur një krim që nuk e zbardhën dot një ekip me 20 hetues në atë kohë.
Pesë shqiptarë u arrestuan në atëherë, por ata u liruan. Nga frika e hakmarrjes, ata nuk thanë asgjë përpara hetuesve.
Detektivët Buettner dhe Detscher shpresojnë se pas kaq shumë vitesh, dikush mund të flasë.
Disa të dhëna megjithatë kanë dalë në dritë.
Mendohet se me shumë gjasë, vrasja e dy shqiptarëve ishte hakmarrje nga bosi i një bande shqiptare të drogës.
Ndërsa ai ishte në burg, mësoi se një prej dy viktimave kishte nisur një aferë me gruan e tij. Jo vetëm kaq, por ata kishin nisur të zhvatin para prej tij.
Në këtë mënyrë, ai urdhëroi vrasjen e tyre.
Altan B. dhe Alban M. dolën në pritë pa e ditur se çfarë i priste. Ata u qëlluan nga afër nga dy persona. Një i tretë i priste në makinë për t’u arratisur pas masakrës.
Një nga viktimat u gjet me çelësat e makinës në dorë.
Dy detektivët dhe gazetari kanë apeluar për ndihmë, duke ofruar një numër ku mund të jepet informacion për ngjarjen në fjalë.
Ata besojnë se grupi kriminal i asaj kohe nuk luan më ndonjë rol në skenën kriminale të drogës në Esen.
