Identifikohet gruaja e plagosur nga të shtënat në fshatin Sulaj të Fierit.
Raportohet se Suzana Merrnica, 50 vjeç, ka marrë plagë në trup të shkaktuara nga një armë zjarri.
Policia bën me dije se autorët e dyshuar të plagosjes janë Afrim dhe Ali Cimili (babë e bir), banues në Dërmënas të cilët janë shpallur në kërkim.
Mësohet se 50-vjeçarja po lëvizte me motor bashkë me të birin, në momentin e të shtënave.
“Plagosën me armë zjarri një shtetase, identifikohen dhe shpallen në kërkim autorët(babë e bir).
Rreth orës 14:00, në vendin e quajtur “Mbikalimi i Dërmënasit”, në rrethana ende të paqarta, është plagosur me armë zjarri shtetasja S. M. Nga hetimet paraprake dyshohet se autorë janë shtetasit A. C., 66 vjeç dhe A. C., 23 vjeç, banues në Dërmënas (babë e bir), të cilët janë shpallur në kërkim.
Janë ngritur menjëherë pika kontrolli në hyrje/daljet e qytetit të Fierit dhe në akset “Fier-Vlorë”, “Fier-Lushnjë”. Gjithashtu, shërbimet e Policisë vijojnë krehjen e zonës, me qëllim lokalizimin dhe kapjen e autorëve“, njofton policia.
Grupi hetimor ndodhet në vendngjarje dhe në drejtimin e prokurorit, po punon për sqarimin e rrethanave të ngjarjes, si dhe për fiksimin e çdo prove që do t’i shërbejë hetimit, me qëllim kapjen e autorëve.
