Shtetet e Bashkuara të Amerikës kanë kërkuar rishqyrtimin dhe mbylljen graduale të misionit të UNMIK-ut në Kosovë, duke e cilësuar atë si një mision të tejkaluar, jo paqeruajtës dhe me shpenzime të panevojshme.
Përfaqësuesi i SHBA-së në Këshillin e Sigurimit të OKB-së, John Kelley, tha se 81 për qind e buxhetit të UNMIK-ut shpenzohet për paga të stafit, ndërkohë që misioni nuk ka më ndonjë funksion të vërtetë në Kosovë dhe nuk kontribuon në paqe.
“UNMIK është një mision paqeruajtës pa paqeruajtës, me një mandat të tejkaluar prej kohësh. SHBA u bën thirrje anëtarëve të tjerë të Këshillit që të rishqyrtojnë mandatin e UNMIK-ut dhe të fillojnë një mbyllje të rregullt të operacioneve të tij. Koha për këtë tranzicion ka kaluar,” deklaroi Kelley.
Ai theksoi se misioni nuk ka më asnjë rol në qeverisjen e Kosovës dhe vazhdon të mbetet i stërngarkuar dhe i tejfinancuar.
Në lidhje me takimet e ardhshme për UNMIK-un në Këshillin e Sigurimit, SHBA-të kanë rekomanduar që ato të zhvillohen në formë të mbyllur, për të mundësuar një diskutim më të sinqertë dhe më pak performancë.
“Besojmë se këto informime duhet të reduktohen dhe të mbahen vetëm një herë në vit, për shkak të ngarkesës së madhe të agjendës së Këshillit të Sigurimit,” tha Kelley.
Kelley po ashtu tha se normalizimi i marrëdhënieve mes Kosovës dhe Serbisë është qenësor për Ballkanin Perëndimor.
“Kosova dhe Serbia duhet të punojnë në zbutje të tensioneve, të përmbahen nga retorikat eskaluese mes tyre dhe në rajonin e tyre për një të ardhme më prosperuese. Qëllimi përfundimtar duhet të jetë njohja e ndërsjellë. Normalizimi i marrëdhënieves mes Kosovës dhe Serbisë është qenësor për gjithë Ballkanin Perëndimor. Amerika dhe komuniteti global janë më të sigurta kur vendet i zgjidhin konflitet mes tyre në mënyrë paqësore”, ka deklaruar Kelley.
