Adriatik Lapaj dhe kandidatët e qarkut Fier nga koalicioni “Nisma Shqipëria Bëhet” u ndalën këtë të martë në fshatin Grabjan, në Divjakë, ku ndanë disa nga pikat e programit me fermerët dhe blegtorët e zonës.
Gjatë takimit me banorët e Grabjanit, Adriatik Lapaj u bëri thirrje të reflektojnë mbi realitetin e përditshëm dhe i ftoi që më 11 maj të ndëshkojnë me votë një klasë politike që, sipas tij, i ka lënë pa shërbime bazë dhe pa dinjitet.
“Tani mendoni një çast të nderuar banorët e Grabjanit, vetëm një moment mendoni, nëse kutinë e votimit do ta kishit me vete gjatë katër viteve, dhe kur të shkonit në spital dhe nuk do të merrnit shërbim, e do të mund të votonit atë çast, do të votonit për këta, po apo jo?
Po nuk mund të votoni, pra sepse këta u kanë lënë pa ilaçe.
Nëse kutinë e votimit do ta kishit me vete gjatë katër viteve, dhe kur shkoni, merrni atë pensionin e ulët që s’u del për ilaçet, do t’i votonit, do t’i ndëshkonit, po apo jo?
Nëse kutinë e votimit do ta kishit aty te dera, kur fëmija ikën në emigrim, kur sa herë vijnë dhe ikin, i përcillni me lot në sy, do t’i votonit, po apo jo?
Nëse kutinë e votimit do ta kishit aty te buza e kanalit, kur hidhnin produktet tuaja që nuk u shitën, sepse vjen kontrabandë nga jashtë, do t’i votonit ju me këta, po apo jo?
Nëse kutinë e votimit do ta kishit me vete, kur shkoni aty në shkollë dhe fëmija nuk ka kushte, atë çast dhe e shihni që dridhet nga i ftohti, do t’i votonit këta apo jo?
Pra, më njëmbëdhjetë maj, kur të shkoni të votoni, duhet të keni parasysh shkollat e prishura, fëmijët e ikur në emigrim, lekët që mungojnë për subvencione, ujin që u mungon në fusha, ilaçet që u mungojnë në spitale, pensionet e ulëta, ndihmën ekonomike me të cilën ju tallin, pamundësinë për të jetuar në vend të dinjitoz, të gjitha këto duhet t’u bëjnë ta ndëshkoni këtë klasë politike dhe ta çani sistemin”, tha Lapaj.
