Analisti Enton Abilekaj, ka komentuar përgjimet e SPAK ndaj Erion Veliajt në qeli, ku tha se ato nuk tregojnë asgjë që nuk dihej, siç është kapja dhe dirigjimi i mediave apo sulmi ndaj prokurorëve.
Analisti tha se këto përgjime nuk i shërbejnë çështjes dhe SPAK i ka nxjerrë për të portretizuar Veliajn si personazh negativ, për të patur një avantazh ndaj tij.
“Nga ato që kanë rrjedhur nga vetë SPAK nuk ka ndonjë gjë që nuk e dinim. Me aq sa kemi parë, nuk ka asgjë më shumë se statuset e Erion Veliajt në Facebook. Ato që Veliaj bënte duke denigruar dhe kërcënuar Ols Dadon, ishin aty por në forma të tjera. Kishte organizim të mediave aty dhe marrëdhëniet e Veliajt me Ramën dhe socialistët, Ulsi Manjën.
Janë marrëdhënie familjare të Veliajt, ato që dolën nuk e rëndojnë Veliajn më tepër, por i denigrojnë figurën. Thonë ky është njeriu që shan, që lidhet dhe bën biseda për 2 mln euro, merret me djalin dhe familjen e prokurorit, gjëra të tilla, që një pjesë i dinim, por duke dalë kështu e njohim më mirë. A duhet të jenë pjesë të çështjes? A duhet të dilnin dhe çfarë vlere kanë?
Nga reagimet e tij kuptohej se mund të prishë prova, ka bërë statuse, ka dërguar mesazh hetuesit të BKH, kjo pjesa që ka dalë nuk tregon ndonjë gjë, tejkalon masën në gjëra që nuk i interesojnë çështjes. I interesojnë publikut që të përshkruhet si personazh negativ, që mund ta dënojmë edhe pa prova.
Ky është precedent i rrezikshëm. Kjo ka ndodhur me çdo cështje. Nëse hedh dikë në gjyq dhe fillon hetim, jeni dy palë dhe duhet të keni të drejta të barabarta. SPAK përdor mjete të paligjshme dhe jo morale, duke shkelur sigurinë ligjore të çdo njeriu. Këtë treguan këto, që SPAK është gati të shkelë të drejtat e çdo qytetari, për të qenë superior“, tha Abilekaj në TPZ.
