Presidenti rus, Vladimir Putin, mbajti sot një fjalim nga ku foli ndër të tjera edhe për deklaratat e përsëritura të Donald Trump, i cili ka shprehur dëshirën e tij për të bërë Groenlandën pjesë të territorit amerikan.
Presidenti rus tha se ambiciet e Trump nuk përbëjnë befasi për të.
Putin tha se plane të ngjashme u ngritën për herë të parë nga Uashingtoni në vitet 1860, por aso kohe propozim për të aneksuar Groenlandën dhe Islandën u refuzua nga Kongresi.
“Këto plane kanë rrënjë të thella historike dhe është e qartë se SHBA do të vazhdojë të promovojë interesat gjeopolitike, ushtarake dhe ekonomike në Arktik. Sa i përket Groenlandës, mendoj se kjo është një çështje që ka të bëjë me dy shtete dhe nuk ka të bëjë me ne.
Megjithatë, ne jemi të shqetësuar nga fakti që vendet e NATO-s në rritje e identifikojnë veriun e largët si një bazë për konflikte të mundshme”, tha Putin.
Kujtojmë se presidenti Donald Trump ka deklaruar se dëshiron që Groenlanda të bëhet pjesë e Shteteve të Bashkuara dhe nuk e përjashton mundësinë e përdorimit të forcës ushtarake apo ekonomike për të bindur Danimarkën ta dorëzojë ishullin me burime të pasura minerale dhe me rëndësi strategjike.
“Groenlanda është një vend i jashtëzakonshëm dhe populli i saj do të përfitonte jashtë mase nëse dhe kur të bëhet pjesë e kombit tonë”, ka thënë Trump në një postim në Truth Social.
Kërkesat e Trump për Groenlandën nuk janë të reja. Ai ka shprehur interesimin e tij për ta blerë ishullin nga Danimarka edhe në vitin 2019, por u refuzua.
